Кумитаи кор бо ҷавонон ва варзиш вобаста ба вазъи пошхӯрии оилаҳои ҷавон дар ҷомеа, роҳҳои ҳалли ин масъалаи мубрам ва таҳлили вазъи имрӯза дар сатҳи ҷумҳурӣ дар мавзӯи “Омӯзиши масъалаи ҷудошавӣ (вайроншавӣ)-и оилаҳои ҷавон ва роҳҳои пешгирии он дар Ҷумҳурии Тоҷикистон” мизи мудаввар доир намуд.

Дар чорабинии мазкур намояндагон аз вазорату идораҳо, ташкилоту муассисаҳо, Шӯрои уламо, мудирони шӯъбаҳои кор бо занон ва оила, бахшҳои кор бо ҷавонон ва варзиши шаҳри Душанбе ва ноҳияҳои тобеи ҷумҳурӣ, муовинони ректорҳо, мудирони шӯъбаҳои ҷавонон ва занони донишгоҳу донишкадаҳои ҳудуди шаҳри Душанбе иштирок ва ибрози ақида намуданд.

Аҳмадзода Дилнозаи Давроналӣ, муовини раиси Кумитаи кор бо ҷавонон ва варзиш чорабиниро ифтитоҳ бахшида, пешгирии ҷудошавии оилаҳо дар ҷомеаи шаҳрвандро яке аз масъалаҳои муҳим ва хеле нигаронкунанда арзёбӣ кард.

“Имрӯз дар баъзе хонадон хушунат ва зӯроварӣ яке аз сабабҳои асосии ҷудошавии оилаҳо маҳсуб меёбад. Мардон бо истифода аз ҷисми қавӣ ва зуриву дағалӣ ҳамсари худро ҳатто дар пеши чашмони фарзандонашон зери мушту лагад қарор медиҳанд. Дар сурате, ки мард вазифадор аст, оилаи хешро эҳтиром намояд, хушунат кардан нисбат ба занонро раво надонад ва тарбияи фарзандони рӯҳану ҷисман солим, фазои солимро муҳайё созад”,-гуфт дар идома Аҳмадзода Дилноза, муовини раиси Кумитаи кор бо ҷавонон ва варзиш.

Дар чорабинӣ ҳамчунин иттилоъ дода шуд, ки дар 11 моҳи соли гузашта дар ҷумҳурӣ 71592 оила бунёд гардида, мутаассифона боз 10140 оила аз ҳам ҷудо гардидаанд. Ин шумора нисбат ба ҳамин давраи соли 2017 7,9% зиёд гардидааст. Аз ин шумора метавон хулоса кард, ки маърифати баланди оиладорӣ то ҳол дар сатҳи зарурӣ ташаккул наёфтааст.

Гуфта шуд, ки соли 2017 аз ҷониби Кумитаи кор бо ҷавонон ва варзиш тадқиқотҳои сотсиологӣ дар мавзӯи “Омӯзиши масъалаҳои ҷудошавӣ (вайроншави)-и оилаҳои ҷавон ва роҳҳои пешгирии он дар Ҷумҳурии Тоҷикистон” ва муайян намудани сабабҳо, омилҳои вайроншавии оилаҳои ҷавон аз рӯи методҳои пурсиши рӯ ба рӯ, мушоҳида, мусоҳибаҳои амиқ, таҳлили ҳуҷҷатҳо гузаронида шуд. Раҳимзода Шоҳзод, сардори Раёсати кор бо ҷавонони Кумитаи кор бо ҷавонон ва варзиш қайд кард, ки тадқиқоти сотсиологӣ дар маҳалҳои осебпазири ҷумҳурӣ, шаҳрҳои Душанбею Кӯлоб, ноҳияи Рӯдакӣ ва Файзобод гузаронида шудааст.

Ба гуфтаи мавсуф яке аз суолҳое, ки ба иштирокчиён дода шуд, ин “Синни мувофиқи оиладоршавӣ барои мардон кадом аст?” буд, ки аз 1144 нафар пурсида шуд. Маълум гардид, ки коэффитсиенти аз ҳама мувофиқ барои оиладор шудани мардон синни 25-сола будааст, ки 42 %-ро ташкил медиҳад. Ҳамчунин суоли дигар чунин буд:“Синни мувофиқи оиладоршавӣ барои занон кадом аст?”. Дар ин пурсиш 1139 нафар иштирок намуда, бештари иштироккунандагон синни 20-сола, ки 26,6 % ва 23-сола 13,3 %-ро ташкил медиҳад, интихоб намуданд. Ба гуфтаи Раҳимзода Шоҳзод, саволи ҷолиб барои иштироккунандагон ин – “Бо кадом роҳ барпо кардани оила мувофиқ аст?” буд, ки 1180 нафар пурсида шуданд.

Аз пурсиш муайян гардид, ки 80 %-и онҳо мехоҳанд оиларо бо роҳи меҳру муҳаббат барпо намоянд. Танҳо 19 фисад бо хоҳиши волидан барпо кардани оиларо хостаанду халос. Вале имрӯз мебинем бештари ҷавонон танҳо бо хости волидон оила бунёд мекунанд, ки ба зудӣ пош мехӯрад. Пас аз тадқиқоти сотсиологӣ бармеояд, ки ҷавонон бояд барои зиндагии осудаву пур аз меҳр ҳамсарро худ интихоб намоянд.

Дар интиҳо таъкид гардид, ки сабабу омилҳои зиёди ҷудошавии оилаҳо дар ҷомеаи имрӯза ҷой дораду хеле нигаронкунанда аст, ки баҳри пешгирии он аз ҳар яки масъулини сохторҳои дахлдор вазифаҳои мушаххасро талаб менамояд. Барои пешгирии пошхӯрии оилаҳои ҷавон, ки нисбат ба солҳои қаблӣ зиёд шудааст, ба намояндагони сохторҳои дахлдор пешниҳод ва тавсияҳои муфид дода шуд.