Имрӯз - 6 март зимни ҷаласаи навбатии Шурои уламои Маркази исломии Ҷумҳурии Тоҷикистон оғози моҳи шарифи Рамазон дар кишвар муайян гардид.

Нахуст дар ҷаласа Саидмукаррам Абдуқодирзода, раиси Шурои уламои Маркази исломӣ суханронӣ намуда, изҳор доштааст, ки имсол моҳи мубораки Рамазон мувофиқи далелҳои илмӣ ва дар асоси хулосаи Институти астрофизикаи Академияи миллии илмҳои Ҷумҳурии Тоҷикистон дар кишвар аз 11-уми март - рӯзи душанбе оғоз мегардад.

Бояд гуфт, ки тибқи қарори Шурои уламо, нисоби закот 35 ҳазору 275 сомонӣ муқаррар гардид, ки аз он 880 сомонӣ закот пардохт карда мешавад.

Инчунин садақаи фитр мувофиқи меъёри шаръӣ баробар ба 7 сомонӣ ва Фидяи савм дар моҳи Рамазони соли 2024 барои соҳибони узри шаръӣ (шайхи фонӣ) ё бемороне, ки умеди беҳбудӣ надоранд ба миқдори 420 сомонӣ барои 30 рӯз муайян карда шуд.

Зимнан аз миқдори 420 сомонӣ барои як рӯз 14 сомонӣ муқаррар шуд.

Гулафшон КАРИМОВА, “ҶТ”