Субҳи имрӯз дар Маркази тадқиқоти стратегии назди Президенти Ҷумҳурии Тоҷикистон маҳфили навбатии журналистикаи иқтисодии “Тавозун” дар мавзӯи “Минтақаҳои озоди иқтисодӣ: имкониятҳо барои рушд” аз тарафи Ташкилоти ҷамъиятии “Хома” баргузор гардид.

Дар маҳфили мазкур намояндагони Вазорати рушди иқтисод ва савдо, Вазорати молия, Маркази тадқиқоти стратегии назди Президенти Ҷумуҳрии Тоҷикистон, коршинсон дар самти идораи молияи давлатӣ, намояндагони сафоратхонаҳои Русия, ИМА ва Афғонистон, намояндагони ВАО ва ташкилоту созмонҳои журналистӣ ва фаъолони ҷомеаи шаҳрвандӣ ширкат доштанд.

Дар маҳфил аз тарафи масъулини вазоратҳои номбурда ва Маркази тадқиқоти стратегӣ дар мавзӯъҳои марбут ба минтақаҳои озоди иқтисодии Тоҷикистон, муваффақиятҳо, камбудиҳо, имкониятҳои рушд ва инкишофи онҳо, дастгириҳои Ҳукумати кишвар, сармоягузории дохиливу хориҷӣ дар самти фаъолияти минтақаҳои озоди иқтисодии Тоҷикистон ва дигар паҳлуҳои вобаста ба он ба журналистон маълумоти лозимӣ дода шуд.

Дар навбати аввал Шаҳло Акобирова, директори Ташкилоти ҷамъиятии “Хома” дар ифтитоҳи маҳфил изҳор дошт, ки: “Ташкилоти ҷамъиятии “Хома” бо мақсади фароҳам овардани заминаи мусоид барои табодули афкору таҷриба дар инъикоси босифат ва шаффофи масоили иқтисодӣ дар ВАО-и Тоҷикистон кӯшиш мекунад, ки дар доираи маҳфили “Тавозун” мунтазам вохӯриҳоро баргузор намояд. Дар ин вохӯриҳо рӯзноманигорон, коршиносони байналмилалӣ ва ватанӣ, намояндагони мақомоти давлатӣ, олимон ва таҳлилгарон бо ҳам ба муҳокимаи масъалаҳои мубрами иқтсодӣ ва дигар масъалаҳои вобаста ба он мепардозанд”.

Ҷовид Ҳусейнов, сармутахассиси Раёсати маъмуригардонии минтақаҳои озоди иқтисодии Вазорати рушди иқтисод ва савдои Ҷумҳурии Тоҷикистон дар суҳбат бо рӯзноманигорон чунин изҳор намуд: “Аз лаҳзаи аввали таъсис ёфтану ба фаъолият пардохтани минтақаҳои озоди иқтисодии Тоҷикистон то имрӯз 10 сол мешавад. Давоми 10 соли мавҷудияти минтақаҳои озоди иқтисодии кишвар имконият фароҳам оварда шуд, то ки 1100 ҷойи нави корӣ таъсис дода шавад ва аз ҳисоби шаҳрвандони Тоҷикистон мутахассисон ба кор ҷалб низ гарданд. Мо ният дорем, ки барои бештар таъсис додани минтақаҳои озоди иқтисодӣ дар минтақаҳои дигари мамлакат сармоягузорони хориҷиву дохилиро ҷалб намоем ва барои таъсис додани ҷойҳои кории бештар, дар натиҷаи ин беҳтар шудани сатҳи зиндагии мардуми кишвар заминаи мусоид фароҳам биёрем”.

Намояндаи Вазорати молияи кишвар изҳор дошт, ки: “Дар ин муддат аз ҳисоби буҷети давлатӣ 40,5 миллион сомонӣ баҳри рушд ва тақвияти фаъолияти минтақаҳои озоди иқтисодии Тоҷикистон равона гардидааст, ки аз ин ҳисоб 32,5 миллион сомонияш ба давраи солҳои 2011-2018 ва 8 миллион сомонии боқимондааш ба соли 2019 рост меояд. Фоидаи бадастомада аз ҳисоби фаъолияти минтақаҳои озоди иқтисодии Тоҷикистон то имрӯз зиёда аз 600 миллион сомониро ташкил медиҳад, ки қисмати зиёди ин даромад ба Минтақаи озоди иқтисодии Суғд марбут мебошад”.

Дар маҳфил суҳбати озоди рӯзноманигорон бо масъулин дар мавриди масъалаҳои муҳими марбут ба фаъолияти минтақаҳои озоди иқтисодии Тоиҷикистон доир гашт. Рӯзноманигорон бо пешниҳоди суолҳо аз намояндагони дар маҳфил ҳузурдоштаи вазоратҳои номбурда маълумоти дақиқу мушаххасро ба даст оварданд.

Гуфта шуд, ки аз сабаби оне, ки масъалаҳои иқтисодии Тоҷикистон, аз он ҷумла масоили рабтдошта ба минтақаҳои озоди иқтисодии кишвар ҳарчанд аз тарафи рӯзноманигорон ба риштаи таҳлилу баррасӣ кашида мешавад ва дар ВАО инъикос меёбад, вале ҳанӯз ҳам кам аст. Бояд дар ин самт низ корҳои бештару беҳтар аз қабл анҷом дода шавад, то роҳҳои хубу беҳтари рушд ва инкишофи фаъолияти минтақаҳои озоди иқтисодии кишвар ва дар ин замина баланд бардоштани иқтисодиёти давлат ва беҳтар сохтани сатҳи зиндагии аҳолии мамлакат ба даст ояд. Рӯзноманигорон ва ВАО асоситарин неруи пешбаранда ва амалигардонандаи ин ҳадафҳо мебошанд.