Ба ифтихори 30 - солагии Қувваҳои Мусаллаҳи Ҷумҳурии Тоҷикистон ва бо ҳадафи аз наздик шинос шудан, бо шароити зист ва имкониятҳои низомиёни кишвар масъулини Раёсати кор бо ҷавонон ва варзиши Вилояти Мухтори Кӯҳистони Бадахшон бо ҳайати шахсии сарбозону афсарон ва прапоршикони Отряди сарҳадии шаҳри Хоруғ мулоқот намуданд.

Сардори раёсат Маҳмадюсуф Асадбеков дар вохӯрӣ бо аскарону таълимдиҳандагони Маркази таълимии Қӯшунҳои сарҳадии КДАМ - и Отряди сарҳадӣ изҳор дошт, ки Ҳукумати мамлакат, бахусус Сарфармондеҳи Олии Қувваҳои Мусаллаҳи ҷумҳурӣ, генерали артиш муҳтарам Эмомалӣ Раҳмон давоми 30 сол ба иқтидори мудофиавии Тоҷикистон таваҷҷуҳи асосӣ зоҳир намуда, баҳри таҷдиду азнавсозии иншооти ҳарбӣ, баланд бардоштани маҳорату тахассуси ҳайати шахсии низомиён тадбирҳои воқеиро мавриди корбурд қарор доданд.

Тавре Пешвои муаззами миллат муҳтарам Эмомалӣ Раҳмон дар Паёми ахир ба Маҷлиси Олии Ҷумҳурии Тоҷикистон таъкид намуданд: “Хизмат дар сафи Қувваҳои Мусаллаҳ барои ҷавонон мактаби ҷавонмардӣ маҳсуб ёфта, дар руҳияи ватандӯстиву ватанпарварӣ, худшиносиву худогоҳӣ тарбия намудани хизматчиёни ҳарбӣ ва барои онҳо муҳайё намудани шароити хуби хизмат, инчунин, риояи талаботи ойинномаҳои ҳарбӣ муҳимтарин самти сиёсати мудофиавии кишвар маҳсуб меёбад”.

- Бо дарназардошти вазъи мураккаби ҷаҳони муосир ва минтақа бо азму иқдоми роҳбарияти олии мамлакат ҷузъу томҳои Қувваҳои Мусаллаҳ минбаъд ҳам навсозию муҷаҳҳаз гардида, дар самти баланд бардоштани омодабошии ҳарбӣ ва тақвияти иқтидори мудофиавии кишвар чораҳои бетаъхир андешида мешаванд. Аз ин рӯ, дар ҷавоб ба ҳамаи ғамхориҳои Ҳукумат ва Сарвари давлат низомиёнро аз ҳарвақта бештар лозим меояд, ки ҳушёрию зиракӣ, маҳорату малакаи ҳарбиро аз даст надода, дар рифоҳу озодии мардум ва ҳифзи сарҳади давлатӣ талошҳои зиёд намоянд, - гуфт М. Асадбеков, сардори Раёсати кор бо ҷавонон ва варзиши вилоят.

Сипас масъулини раёсат барои аёдати аскарон ба Госпитали ҳарбии 04 33 - и Қӯшунҳои сарҳади КДАМ - и отряди сарҳадӣ рафта, бо шароити мавҷудаи онҳо аз наздик шинос шуданд.

Дар охир теъдоде аз хизматчиёни ҳарбӣ ба ифтихори 30 - солагии таъсисёбии Қувваҳои Мусаллаҳи кишвар ва баҳри хизмати содиқона ба Ватан бо ифтихорномаи Раёсати кор бо ҷавонон ва варзиши вилоят ва туҳфаҳои варзишӣ қадрдонӣ шуданд