8 феврал бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба 29-солагии Қувваҳои Мусаллаҳи кишвар рӯзи дарҳои кушод дар қисми ҳарбии 0123-и Қӯшунҳои сарҳадии Кумитаи давлатии амнияти миллии Ҷумҳурии Тоҷикистон таҳти унвони "Хизмат ба Ватан шарафи ҷавонмардист" баргузор гардид.

Дар чорабинии мазкур Дилноза Аҳмадзода, муовини раиси Кумитаи кор бо ҷавонон ва варзиш ва Нусратулло Каримов, муовини қисми ҳарбии 0123 оид ба корҳои сиёсӣ- тарбиявӣ иштирок ва суханронӣ намуданд.

Таъкид гардид, ки таҳти роҳбарии Сарфармондеҳи Олии Қувваҳои Мусаллаҳи Ҷумҳурии Тоҷикистон, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Артиши миллӣ бунёду таҳким ёфта, имрӯз барои хизмат дар сафи Қувваҳои Мусаллаҳ тамоми шароитҳо муҳайё мебошанд.

Дар чорабинии мазкур 100 нафар ҷавонони синни даъватӣ иштирок намуда, тибқи барномаи таҳиянамуда онҳо аз имкониятҳои мавҷуда ва воқеии қисми ҳарбӣ ва маркази таълимии пойтахт, ошхона, хобгоҳ, хонаи маишӣ, хонаи истироҳатӣ, ҷойи машқу таълимгоҳ, майдону толори варзишӣ, китобхона ва осорхона дидан намуданд.

Дар фарҷоми чорабинӣ ба ҳайати шахсиву сарбозону афсарон аз ҷониби Кумита сипоснома ва туҳфаҳои хотиравӣ тақдим карда шуданд.