10 март Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Шабнам Раҳимзода, муовини аввали раиси Кумитаи мазкур ҷиҳати муборакбодии аҳли эҷоди рӯзномаи “Ҷавонони Тоҷикистон” бахшида ба Рӯзи матбуот ба идораи рӯзнома ташриф оварданд.

Нахуст Абдулло Раҳмонзода, раиси КҶВ кормандони рӯзномаро ба Рӯзи матбуоти тоҷик табрик намуда, таъкид кард, ки рӯзномаи “Ҷавонон...” ягона минбарест, ки тамоми паҳлуҳои ҳаёти ҷавононро бозгӯию баррасӣ менамояд.

- Матбуот дар ҳама давру замон таъсири худро дар ҷомеа дошт ва имрӯз ҳам дар раванди тараққиёти ҷомеа саҳмгузор аст. Ҳама чизе, ки имрӯз ба вуҷуд омадааст, муваққатӣ аст. Замоне нахустин шабакаҳои иҷтимоӣ, чун маилагент баромада буд, ки имрӯз аллакай онро истифода намебаранд ва дигар шаклҳои он. Шояд боз шабакаҳои дигаре бароянд, аммо ин равандҳои муосир мегузаранду китобу маҷаллаву рӯзномаҳо ба пуррагӣ ҷойи худро мегиранд. Ҳарчанд, ки имрӯз ҷойгоҳи худро матбуоти чопӣ аз даст надодааст, аммо боз мавқеаш мустаҳкамтару сафи хонандагонаш зиёд мегардад, - гуфт дар идомаи суханронии хеш Абдулло Раҳмонзода.

Номбурда доир ба моҳият ва муҳтавои имрӯзаи рӯзномаи “Ҷавонони Тоҷикистон” таъкид намуд, ки маводҳои имрӯзаи рӯзнома кӯтоҳ, дорои факту рақамҳои зиёд ва таҳлилҳои хуб мебошад, ки ин рӯзномаро хонданибоб намудааст.

Баъдан Шодихони Назар, сармуҳаррири рӯзномаи “Ҷавонони Тоҷикистон” зимни суханронии хеш аз дастгириҳои пайвастаи роҳбарияти Кумита изҳори қаноатмандӣ намуд.

Ҳамчунин раиси Кумита дар ҷараёни вохӯрӣ Гулчеҳра Фозилова, собиқадори рӯзномаро, ки имрӯз ҷашни мелод доштанду ба синни 73-солагӣ расиданд, таҳният гуфта, ҳамчун рамз дастагули иборат аз 73 дона гулро тақдим карданд.

Дар охир акси хотиравӣ гирифта шуда, раиси Кумита ба қаламкашони рӯзнома барору комёбӣ таманно намуданд.