ҶОМЕА
Душанбе 24 Июн 2024 04:07
10383
Дирӯз-28 май Ҷамолиддин Абдуллозода, вазири тандурустӣ ва ҳифзи иҷтимоии аҳолии кишвар бо Ван Фенчао, Раиси ҳукумати мардумии шаҳри Чэндуи Чин мулоқот намуд.

Дар ин хусус гурӯҳи фейсбукии Маркази матбуотии Вазорати тандурустӣ иттилоъ медиҳад.

Гуфта мешавад, ки дар вохӯрии мазкур ҳамзамон ҳайати ҳукумати мардумии шаҳри Чэндуи Ҷумҳурии Мардумии Чин, сардорони раёсату шуъбаҳои дахлдори зерсохтори вазорат, роҳбарони марказҳои тиббию табобатии шаҳрӣ ва ҷумҳуриявӣ ширкат доштанд.

Тибқи иттилои манбаъ зимни вохӯрӣ ҳамзамон доир ба густариши ҳамкориҳо дар бахши тибби халқӣ, табодули таҷрибаи табибони ду кишвар, ба роҳ мондани корҳои илмӣ-татқиқотӣ дар соҳаи тиб, коркарди гиёҳҳои шифобахш ва дигар масъалаҳои мавриди таваҷҷуҳи тарафайн мубодилаи афкор сурат гирифт.

Таъкид гардид, ки тибби халқӣ дар аксари кишварҳои ҷаҳон ба таври васеъ истифода мешавад ва шумораи бештари кишварҳо аҳамияти тибби анъанавӣ дар соҳаи тандурустиро эътироф намуда, онро дар системаҳои миллии тандурустии худ бомуваффақият ҷорӣ мекунанд. Осиёи Марказӣ яке аз қадимтарин марказҳои тамаддуни ҷаҳонӣ буда, дар он тиб яке аз ҷойҳои муҳимтаринро ишғол мекунад, ки таърихи тибби тоҷик мисоли равшан аст.

Баъдан, ҳамчунин ба ҳозирин наворҳои кӯтоҳи видеоӣ доир ба муваффақияту дастовардҳои шаҳри Чэндуи Ҷумҳурии Мардумии Чин ва фаъолияти Корхонаи воҳиди давлатии “Маркази ҷумҳуриявии тибби халқӣ”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон намоиш дода шуд.

Дар фарҷом изҳор гардид, ки натиҷаи вохӯрии мазкур ба таҳкими робитаҳои Тоҷикистону Чин дар соҳаи тандурустӣ, илми тиб ва ҳифзи иҷтимоии аҳолӣ ва махсусан тибби халқии тоҷику чинӣ мусоидат менамояд.

Гулафшон КАРИМОВА, “ҶТ”

Эзоҳи худро нависед



Рамзҳо дар расм