Имрӯз, 13 октябр, дар бозори “Ҷал-Ҷам”-и шаҳри Душанбе кормандони ВКД ва гурӯҳи ҷавонони “Пешоҳанг” бо соҳибкорону савдогарон дар мавзӯъҳои мубрами рӯз: пешгирии шомилшавии шаҳрвандон, махсусан ҷавонон ба гурӯҳҳои ҷиноятпеша, ҳизбу созмонҳои террористиву экстремистӣ, тақлид ба маданият ва тарзи либоспӯшии ба фарҳанги мо бегона ва ба ин васила тарбия кардани наслҳои ҷавон дар рӯҳияи садоқат ба Ватан, арзишҳои миллӣ ва умумибашарӣ мулоқот карданд.

Давлат Назаров, муовини сардори Хадамоти пешгирии ҳуқуқвайронкунӣ байни ноболиғон ва ҷавонони ВКД аз фаъолияти пурсамари вазорати корҳои дохилӣ дар ошкорсозӣ ва пешгирии шомилшавии шаҳрвандони кишвар, махсусан ҷавонону ноболиғон ба ҳизбу гурӯҳҳои террористиву экстремистӣ сухан ронда, аз ҷумла гуфт: “ВКД дар ҳамбастагӣ бо дигар мақомоти ҳифзи ҳуқуқи мамлакат баҳри таъмини амният, ҳимояи ҳуқуқу озодиҳои инсон ва шаҳрванд, мубориза бар зидди терроризм ва экстремизм назоратро пурзӯр намудааст”. Ӯ ҳозиринро барои ҳамкориву мусоидат баҳри мубориза ва пешгирии чунин амалҳои номатлуб даъват намуда, қайд кард, ки новобаста аз фаъолияти ВКД ва дигар мақомоти ҳифзи ҳуқуқи ҷумҳурӣ ҷиноятҳои террористӣ ва экстремистӣ ҳоло ҳам идома ёфта, боиси нигаронии роҳбарияти кишвар ва аҳли ҷомеа гардидааст.

Таъкид шуд, ки роҳ надодан ба таҳсили ғайрирасмии ҷавонон дар муассисаҳои таълимии динии ғайрирасмии кишварҳои хориҷӣ яке аз роҳҳои пешгирии шомилшавии ҷавонон ба ҳизбу ҳаракатҳои экстремистиву террористӣ маҳсуб мешавад.



Аслиддин Хушвахтов, роҳбари гурӯҳи ҷавонони “Пешоҳанг” дар баромадаш, аз ҷумла иброз дошт: “Гарчанде шомилшавии ҷавонон ба давлати ба ном исломии Ироқу Шом  (ДИИШ) коҳиш ёфта бошад ҳам, боиси нигаронӣ аст, ки имрӯз садҳо нафар ҷавони мо бо оилаҳои худ, алалхусус занону кӯдакон дар кишварҳои ҷангзадаи Сурия ва Ироқ дар сангинтарин шароит, ки ҳар лаҳза ба ҳаёти онҳо марг таҳдид менамояд, дар муноқишаҳои ҷангӣ иштирок менамоянд. Садҳо нафари онҳо ҳалок гардида, зану фарзандонашон  ятим ва бесаробон монда, рӯзгори сангинро ба сар мебаранд. Вазорати корҳои дохилӣ баҳри пешгирӣ ва баргардонидани шаҳрвандон, бахусус ҷавонон аз давлатҳои ҷангҷӯ чораҳои дахлдор андешида, кӯшиш менамояд, то афроди номбурда аз роҳи бад баргашта, дар назди падару модар, оилаву фарзандон зиндагии осоиштаро ба роҳ монанд. Барои ҳамин, мову шумо дар якҷоягӣ ва муттаҳидӣ метавонем терроризму экстремизмро дар кишвар нобуд намоем”.  

Ҳамчунин, соҳибкорон ба саволҳояшон аз намояндагони ВКД ҷавоб гирифтанд.