26 декабр Абдулло Раҳмонзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар арафаи соли нави мелодии 2023 ва таҷлили 30–солагии таъсисёбии Қувваҳои Мусаллаҳи Ҷумҳурии Тоҷикистон дар Маркази таълимии “Пойтахт”-и Қӯшунҳои сарҳадии Кумитаи давлатии амнияти миллӣ бо сарбозону афсарон мулоқот кард.

Зимни мулоқот раиси Кумита афсарону сарбозони маркази таълимии мазкурро бо омад-омади соли нави мелодӣ муборакбод намуда, баъдан иброз дошт, ки авзои ҷаҳони имрӯз мураккаб ва пешгӯинашаванда аст. Аз ин лиҳоз ҳар яки мову шуморо мебояд, ки зиракии сиёсиро аз даст надода, дар талоши осуда нигоҳ доштани ватану миллати худ бошем.

- Пешвои миллат пайваста таъкид месозанд, ки имрӯз мову шумо дар шароите давлатдорӣ кардаистодаем, ки мутаасифона авзои ҷаҳон хеле печидааст. Дар хоке, ки шумо сарбозон муҳофизаташ мекунед, хуни ҳазорҳо гузаштагони мо ба хотири озодиву соҳиби ин Ватан гардидан рехтааст. Аз ин хотир хокаш муқаддас аст ва ин хоки муқаддас бояд муҳафизаташ кунем”.

Ҳамин гуна, пас аз суханронӣ раиси Кумита ба як қатор афсарони фаъоли ин марказ сипосномаҳо тақдим кард.

Баъдан, Абдулло Раҳмонзода аз осорхона, толори хониш ва китобхонаи маркази таълимӣ дидан намуд. Ҳамин тариқ аз ҷониби КҶВ барои зиёда аз 1200 нафар сарбоз зиёфат ва дастархони идона ташкил карда шуд.

Ёдовар мешавем, ки чунин вохӯриву мулоқотҳо дар арафаи соли нави мелодӣ ва 30 солагии таъсиси Қувваҳои Мусаллаҳ мунтазам ба роҳ монда мешавад.