4 августи соли равон дар шаҳри Хоруғ мулоқоти Ёдгор Файзов бо варзишгарон баргузор гардид.

Тавре аз Раёсати кор бо ҷавонон ва варзиши вилоят иттилоъ доданд, ин вохӯрии судманд дар арафаи таҷлили Рӯзи варзишгарону 30-солагии Истиқлоли давлатии Тоҷикистон доир гардида, дар он паҳлавони номдори тоҷик Сомон Маҳмадбеков, чемпиони Ҷумҳурии Тоҷикистон аз намуди гуштини самбо ва миллӣ - ҷоизадори чемпионати Аврупо ва Авруосиё Хушбахт Қурбонмамадов, варзишгари рақами якуми Федератсияи Русия Маҳмадбек Маҳмадбеков, раиси Федератсияи дзюдо дар вилояти Иркутски Федератсияи Русия Эргаш Маҳмадбеков ва дигарон иштирок намуданд.

Зимни мулоқот асосан рушди соҳаи варзиш дар вилоят, фароҳам овардани заминаю шароитҳои нав барои гӯштини тарзи дзюдо ва тарғиби васеи ҳаёти солим мавриди баррасӣ қарор гирифт.

Сипас раиси ВМКБ варзишгарону мураббиёни онҳоро баҳри саҳми арзанда гузоштан дар рушди соҳаи варзиш бо ифтихорномаю мукофотпулӣ қадрдонӣ намуд.