Имрӯз, 3 апрел раиси шаҳри Душанбе, президенти Ассотсиатсияи футболи Осиёи Марказӣ Рустами Эмомалӣ бо ноиби аввали президенти Ассотсиатсияи кумитаҳои миллии олимпӣ, президенти Кумитаи олимпии Қатар Ҷоан Бин Ҳамад Оли Сонӣ мулоқот кард.

Дар ин бора дафтари матбуоти шаҳри Душанбе хабар медиҳад.

Дар рафти вохӯрӣ Рустами Эмомалӣ ташрифи меҳмони олиқадрро ба Тоҷикистон хайрамақдам гуфта, пешбурди муносибатҳои дӯстона ва ҳамкориҳои мутақобилан судманд бо давлати Қатарро дар сиёсати хориҷии Тоҷикистон аз самтҳои афзалиятнок хонд.

Инчунин, дар мулоқоти дутарафа қайд гардид, ки бо дастгириҳои Президенти Ҷумҳурии Тоҷикистон, Президенти Кумитаи миллии олимпии Тоҷикистон муҳтарам Эмомалӣ Раҳмон соҳаи варзиш, бахусус намудҳои олимпии варзиш дар кишвари мо дар марҳалаи рушд қарор дорад.

Нақши АНОК (Ассоциация национальных олимпийских комитетов- Ассотсиатсияи кумитаҳои миллии олимпӣ) ва Шурои олимпии Осиё дар иштироки фаъоли варзишгарони тоҷик дар Бозиҳои олимпӣ ва Осиё муҳим арзёбӣ шуда, пешниҳод гашт, ки варзиши гуштингирӣ дар марҳалаи аввал ба барномаи Бозиҳои Осиё ва баъдан ба барномаи Бозиҳои олимпӣ ворид карда шавад.

Бояд гуфт, ки АНОК як созмони байналмилалӣ мебошад, ки тамоми 206 кумитаҳои миллии олимпии (КМО) аз ҷониби Кумитаи байналмилалии олимпӣ (КБО ё IOC) эътирофшударо муттаҳид мекунад.

Изҳори бовар карда шуд, ки АНОК ва Шурои олимпии Осиё таклифро ҷонибдорӣ менамоянд.

Яҳё МАҲМАДНАБИЕВ, “ҶТ”