Мувофиқи дастури Маҷлиси намояндагони Маҷлиси Олии Ҷумҳурии Тоҷикистон аз 30 декабр вохӯрии вакилони Маҷлиси намояндагон бо интихобкунандагон дар шаҳру ноҳияҳои Тоҷикистон оғоз шудааст.

Дар ин бора котиби матбуоти Маҷлиси намояндагон Муҳаммадато Султонов ба АМИТ “Ховар” иттилоъ додааст.

Бино ба иттилои манбаъ тайи 10 рӯз, яъне аз 30 декабр то 8 январи соли 2023 вакилони Маҷлиси намояндагон ба назди интихобкунандагони худ ба вилоятҳои Суғд, Хатлон, Бадахшон ва ноҳияҳои тобеи ҷумҳурӣ сафар мекунанд.

Гуфта мешавад, ки вакилон ба интихобкунандагон роҷеъ ба Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, санадҳои меъёрию ҳуқуқие, ки мақоми олии қонунбарори мамлакат қабул кардааст, инчунин самтҳои асосии сиёсати дохилию хориҷии кишвар маълумоти мукаммал медиҳанд.