Дирӯз, 29 июл Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар доираи Бозиҳои тобистонаи олимпии Париж – 2024 дар шаҳри Парижи Фаронса бо Ҷанни Инфантино, президенти Федератсияи байналмилалии футбол (ФИФА) мулоқот намуд.

Дар ин бора маркази таҳлил ва иттилооти дастгоҳи марказии Кумита хабар медиҳад.

Ба иттилои манбаъ ҷонибҳо зимни суҳбат доир ба дурнамои ҳамкории минбаъда, рушди имрӯзу ояндаи футболи Тоҷикистон ва дар доира масъалаи маҳорати баланди футболбозӣ ва таваҷҷуҳи хоси наврасону ҷавонони тоҷик ба футбол табодули афкор намуданд.

Ҷанни Инфантино аз хотироти сафараш ба Тоҷикистон ёдовар шуда, гуфтааст, ки навъҳои гуногуни варзиш, аз ҷумла футбол дар Тоҷикистон ба таври бесобиқа рушд карда истодааст.

- Рушди футбол ва арҷгузорӣ ба ин навъи варзиш дар Тоҷикистон паёми нек дорад ва ҳамин аст, ки Тоҷикистон аз ҷониби Федератсияи байналмилалии футбол (ФИФА) мавриди таваҷҷуҳи хос қарор гирифтааст,-гуфтааст Инфантино.