Шоми имрӯз 11-уми октябр тими мунтахаби футболи Тоҷикистон дар даври ниманиҳоии мусобиқаи байналмилалии “King’s Cup 2024” (“Ҷоми шоҳ-2024”), ки дар Тайланд баргузор мешавад, бо тими миллии Сурия рақобат мекунад. Дар ин бора дафтари матбуоти ФФТ хабар медиҳад.

Дар бозии дигари даври ниманиҳоӣ тимҳои миллии Тайланд ва Филиппин вориди рақобат мешаванд. Ҳарду бозии ниманиҳоӣ дар варзишгоҳи Тинсуланондаи шаҳри Сонгкхлаи Тайланд доир мегардад.

Дар 50-умин мусобиқаи байналмилалии “King’s Cup 2024”, ки дар рӯзҳои FIFA (Федератсияи байналмилалии футбол) – 11-ум ва 14-уми октябр - дар шаҳри Сонгкхлаи Тайланд баргузор мешавад, дар баробари мизбонон дастаҳои мунтахаби Сурия, Тоҷикистон ва Филиппин иштирок мекунанд.

Ғолибони даври ниманиҳоӣ дар финал ва мағлубшудагон дар бозӣ барои ҷойи сеюм мубориза мебаранд. Бозиҳои ҳалкунандаи мусобиқаи “King’s Cup 2024” рӯзи 14-уми октябр доир мегарданд.


Ба иттилои Федератсияи футболи Тоҷикистон, дар ҳамин ҳол дастаи мунтахаби кишвар зери раҳбарии мутахассиси гурҷӣ Гела Шекиладзе ба мусобиқаи байналмилалии "King’s Cup 2024" дар Тайланд омодагӣ мебинад.
Ба ҳайати дастаи мунтахаби Тоҷикистон 23 бозигар – 3 дарвозабон, 7 ҳимоятгар, 10 нимҳимоятгар ва 3 ҳамлагар – шомиланд, ки 13 нафарашон легионеранд ва дар бошгоҳҳои футболи Русия, Эрон, Узбекистон, Гурҷистон, Индонезия, Булғористон ва Қазоқистон бозӣ мекунанд.

Яҳё МАҲМАДНАБИЕВ, “ҶТ”