Дар нимсолаи аввали соли 2025 дар ҳудиди ҷумҳурии Тоҷикистон 534 (2024 419) ҷиноят вобаста ба муомилоти ғайриқонунии маводи нашъадор ба қайд гирифта шудааст, ки 4 фоизи ҷиноятҳои умумиро ташкил дода, дар муқоиса бо ҳамин давраи соли гузашта, 115 ҷиноят ё 27,4 фоиз зиёд ба қайд гирифта шудааст.

Дар ин бора имрӯз - 29 июл Самад Зафар, директори Агентии назорати маводи нашъаовари назди Президенти Ҷумҳурии Тоҷикистон иттилоъ дод.

Инчунин директори Агантӣ илова намуд, ки дар 6 моҳи соли 2025 дар ҷумҳурӣ 3т 107 кг маводи нашъаовар мусодира карда шудааст, ки дар муқоиса ба соли 2024 (3 т 96 кг 616 гр) 10 кг 388 гр зиёд мебошад.

Тавре роҳбари ин ниҳод зикр кард, бо вуҷуди зиёд шудани ҷиноятҳои вобаста ба муомилоти маводи нашъаовар сатҳи нашъамандӣ коҳиш ёфта, шумораи нашъамандони дар қайди расмибуда дар нимсолаи якуми соли 2025 4002 нафарро ташкил дода, назар ба хамин давраи соли 2024 (4066) 1,6 фоиз коҳиш ёфтааст.

Бояд қайд кард, ки имрӯз дар Тоҷикистон ба ҳар 100 ҳазор аҳолӣ 40 нашъаманд рост меояд, ки он назар ба дигар давлатҳо нишондиҳандаи хело паст аст.

Яҳё МАҲМАДНАБИЕВ, “ҶТ”