Дар мақомоти Ваколатдор оид ба ҳуқуқи инсон (ВҲИ) дар нимсолаи аввали соли 2019 – 1875 (2018-1691) муроҷиат ба қайд гирифта шудааст, ки аз онҳо 341 муроҷиати хаттӣ ва 1534 адад шифоҳӣ мебошанд. 

Дар ин бора Бобозода Умед, Ваколатдор оид ба ҳуқуқи инсон дар Ҷумҳурии Тоҷикистон, имрӯз 18 июл, зимни нишасти матбуотӣ ба рӯзноманигорон иттилоъ дода, инчунин гуфт: “Танҳо дар Дастгоҳи марказии ВҲИ 332 адад муроҷиатҳои шахсони воқеӣ ва ҳуқуқӣ ба қайд гирифта шудааст, ки аз онҳо 147 ададаш хаттӣ ва 185 ададаш муроҷиатҳои шифоҳӣ мебошанд. Аз муроҷиатҳои дар Дастгоҳи марказии ВҲИ баррасишуда 18 адад ё 5,4% муроҷиатҳои шахсони воқеӣ ва ҳуқуқӣ мусбат ҳал гардидааст”.

Гуфта шуд, муроҷиатҳои ба Дастгоҳи ВҲИ воридгардида, бештар ба масъалаҳои ҳуқуқ ба муҳокимаи одилонаи судӣ, ҳуқуқ ба манзил, ҳуқуқи инсон ва мақомоти ҳифзи ҳуқуқ, ҳуқуқ ба таъминоти иҷтимоӣ мансубанд.

Ҳабибулозода Раҷабмо Ҳабибуло, муовини Ваколатдор оид ба ҳуқуқи инсон дар Ҷумҳурии Тоҷикистон-Ваколатдор оид ба ҳуқуқи кӯдак дар Ҷумҳурии Тоҷикистон дар идомаи нишаст гуфт, дар шаш моҳи соли ҷорӣ ба Ваколатдор оид ба ҳуқуқи кӯдак 73 адад муроҷиат оиди ҳимояи ҳуқуқи кӯдак ба қайд гирифта шудаву мавриди баррасӣ қарор гирифтааст, ки он нисбат ба ҳамин давраи соли гузашта 24 адад зиёд аст. 

Бино ба таъкиди номбурда аз 73 адад муроҷиатҳои шаҳрвандон оиди ҳуқуқи кӯдак дар ҳамкорӣ ва якҷоягӣ бо дигар мақомотҳои дахлдор ҳашт адади он ба таври мусбат ҳали худро ёфтаанд.