ҶОМЕА
Якшанбе 25 Август 2019 01:49
6316
- Давоми шаш моҳи соли равон вобаста ба ҳамаи самтҳои хизматӣ 348 ҷиноят ба қайд гирифта шуда, кушодашавии онҳо 90 фисадро ташкил медиҳад, - гуфт дар нишасти хабарӣ муовини якуми вазири корҳои дохилӣ, сардори Ситоди байниидоравии мақомоти ҳифзи ҳуқуқ ва таъмини амният дар ВМКБ Абдураҳмон Аламшозода. - Кушодашавии ҷиноятҳо дар ҳолати ноаён низ 90 фоиз буда, дар натиҷаи ба роҳ мондани корҳои оперативӣ - ҷустуҷӯӣ дар қаламрави вилоят 23 нафар ҷинояткороне, ки расман дар кофтуков қарор доштанд аз тарафи кормандони мақомоти корҳои дохилӣ дастгир гардиданд. Аммо мутаассифона 70 фисади онҳоро сокинони шаҳри Хоруғ ташкил медиҳанд.

Дар давраи зикргардида 20 ҳолати дахолату таҳқир ва монеъшавӣ ба фаъолияти кормандони ҳифзи ҳуқуқ, хосса дар постгоҳҳои доимамалкунандаи Бозрасии давлатии автомобилии вилоят нисбати 15 нафар парвандаи ҷиноятӣ оғоз шуда, дар ин самт тафтишот идома дорад.

Ба таъкиди Абдураҳмон Аламшозода дар ин давра аз гурӯҳҳои муташаккили ҷиноятӣ ва шахсони алоҳида дар қаламрави вилоят 332 адад силоҳи оташфишон  мусодира карда шудааст. Аз ҷумла, 43 адад автомати Калашников, 50 адад таппончаи Макаров, як гранатомёт, 118 адад тоз - 8 (милтиқ), 80 милтиқи шикорӣ, 36 карабин ва се адад найзакорд мусодира карда шудааст. Ҳамзамон, миқдори зиёди лавозимоти ҷангӣ аз аҳолӣ мусодира гардида, аз ин шумора 3 178 адад тирҳои гуногун, 115 тирдон, 23 норинҷак, 11 тӯпҳои зермила (подствольник), чор снаряди чархбол, 17 килограмму 250 грамм маводи таркандаи гранулит ва 250 грамм маводи таркандаи аманиту дигар лавозимоти ҷангӣ мусодира гаштааст.

- Дар самти гардиши ғайриқонунии маводи нашъадор 16 ҳолати ҷиноят ба қайд гирифта шуда, аз гурӯҳҳои муташаккили ҷиноятӣ 148 килограмм маводи нашъадор мусодира карда шудааст. Дар натиҷаи гузаронидани амалиёти "Кукнор - 2019" дар умум 869 ҳазору 880 бех растаниҳои бангдонаи худрӯй дар ҳаҷми 1 тоннаву 200 килограмм мусодира гардид, - мегӯяд Ӯ.

Вобаста ба қочоқи метал ва сангҳои қимматбаҳо бошад танҳо панҷ ҳолати ҷинояткорӣ ошкор карда шуда, як килограмм металу сангҳои қимматбаҳо мусодира гардидааст. 
Дар самти бо роҳи қочоқ ворид намудани молу маҳсулот давоми шаш моҳ чор адад нақлиёти калонҳаҷми боркаш дастгир карда шудааст, ки асосан онҳо ба ҷамъиятҳои дорои масъулияташон маҳдуди “Шаҳроми Хуросон”, “Сумаяк - Н” ва “Қайди Хуршед” тааллуқ доштанд. Яъне бо мошинҳои болозикр молу маҳсулоти мардум аз Ҷумҳурии халқии Хитой  тавассути гузаргоҳи Кулма бо роҳи қочоқ вориди Ҷумҳурии Тоҷикистон гашта, вобаста ба ин ҳолат нисбати ҳашт нафар муассису шахсони шарики ҷиноят парвандаҳои ҷиноятӣ оғоз шудааст. Аз ин қочоқ, 1 миллиону 600 000 сомонӣ маблағ рӯёнида шуда, ба буҷаи давлат ворид гардид.

Ба гуфтаи муовини якуми вазири ВКД феълан 206 ҳолати худсарона ишғол намудани қитъаи замин ва сохтмони ғайриқонунӣ дар умум ошкор гашта, нисбати 17 нафар сокинони вилоят парвандаи ҷиноятӣ ва нисбати 68 нафар парвандаҳои ҳуқуқвайронкунии маъмурӣ оғоз карда шудааст. 

Давоми шаш моҳ аз ҷониби мақомоти корҳои дохилӣ 15 674 ҳолати ҳуқуқвайронкунии маъмурӣ ошкор карда шудааст, ки 9 147 адади он ба самти Бозрасии давлатии автомобилӣ рост меоянд. 

Аз ҷумла, 74 ҳолати итоат накардан ба талаботи кормандони милитсия, 46 ҳолат бо рақамҳои бегона, 44 ҳолат бе рақами қайди давлатӣ, 38 далели идора намудани воситаи нақлиёт дар ҳолати мастӣ нисбати 31 нафар ҳабси маъмурӣ ва ҳафт нафари дигар ҷарима тайин шудаастт. Ҳамзамон, 24 ҳолати бо оинаҳои сиёҳкардаи ғайриқонунӣ, 16 ҳолат бе ҳуҷҷати ронандагӣ ва 8 994 ҳолати дигар қоидавайронкуниҳо дар самти БДА ташкил медиҳанд.

Барои истифодабарии воситаҳои нақлиёт бо шишаҳои сиёҳкардашуда дар ин давра ба 252 нафар ронанда ба маблағи 800 000 сомонӣ иҷозатномаи сиёҳшиша дода шуда, 4 290 воситаи нақлиёт аз муоинаи техникӣ гузаштанд.

Инчунин, дар вилоят 1 485 адад шаҳодатномаи намунаи кӯҳна иваз гардида, ба 1 654 адад соҳибони воситаи нақлиёт рақамҳои қайди давлатии нав дода шудааст. 

Дар самти ҳифзи тартиботи ҷамъиятӣ бошад 3 422 протоколҳои ҳуқуқвайронкунии маъмурӣ тартиб дода шуда, вобаста ба содир гаштани ҳолатҳои майдаавбошӣ баъди нӯшидани нӯшокиҳои спиртӣ ва вайрон намудани тартиботи ҷамъиятӣ 203 нафар сокинони вилоят дастгир гардиданду 147 нафари онҳо ба муҳлати аз панҷ то 15 шабонарӯз ба ҳабси маъмурӣ гирифта шуданд ва нисбати 56 нафар ҷарима татбиқ гардидааст.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

Август 2019 c.