20 июл соли 2018 дар Агентии назорати маводи нашъаовари назди Президенти Ҷумҳурии Тоҷикистон нишасти матбуотӣ оид ба натиҷаҳои фаъолияти агентӣ дар нимсолаи якуми соли 2018 баргузор гардид, ки дар кори он директори агентӣ Шерхон Салимзода, сардорони раёсату шуъбаҳои мустақили агентӣ, намояндагони воситаҳои ахбори оммаи ҷумҳурӣ ва хориҷӣ иштирок намуданд.

Пеш аз оғози нишаст бо тартиби дар қонунгузорӣ муайяншуда дар ҳузури комиссия аз ҳисоби намояндагони мақомоти ҳифзи ҳуқуқ ва судӣ 357 кг 111 гр маводи нашъаовар, аз рӯи 17 парвандаи ҷиноятие, ки нисбати онҳо мақомоти судӣ ҳукм баровардааст, дар бухории агентӣ сӯзонида шуд.

Дар баромади худ директори агентӣ Шерхон Салимзода қайд намуданд, ки дар давоми шаш моҳи соли ҷорӣ аз ҷониби мақомоти ҳифзи ҳуқуқ ва сохторҳои қудратии кишвар аз муомилоти ғайриқонунӣ маводи нашъаовар ҷилавгирӣ шуда, дар ин давра 2 т 735 кг 929 гр маводи нашъаовар мусодира карда шудааст, ки ин шумор нисбат ба ҳамин давраи соли гузашта 370 кг 914 гр ё 15, 7 фоиз зиёд мебошад: “Таҳлилҳо нишон медиҳанд, ки дар ин давра мусодираи маводи нашъаовар аз ҷониби АНМН 70 фоиз, ВКД 22 фоиз ва Хадамоит гумрук 40, 2 маротиба зиёд аст,”- гуфт Ш. Салимзода.

Ҳамчунин қайд гардид, ки айни ҳол 6888 нашъаманд дар қайди расмӣ буда, аз онҳо 162 нафарро зан ва 1484 нафарро ҷавонон ташкил медиҳанд.