Дар замони соҳибистиқлолӣ Ҳукумати кишвар дар самти бо ҷои кор ва маоши хуб таъмин намудани аҳолии ҷумҳурӣ сол корҳои зиёдеро ба анҷом расонидааст. Ин раванд боис шуду, марҳила ба марҳила сатҳи некӯаҳволии сокинон хубу беҳ гардид.

Дар тули 27 соли истиқлолияти давлатӣ аз ҷониби Ҳукумати мамлакат дар зери сиёсати хирадмандони Пешвои миллат чандин маротиба музди меҳнати кормандони соҳаи буҷетӣ зиёд гардида, дар буҷети давлатӣ вазифаҳои иҷтимоии он ба инобат гирифта шуда, барои баланд бардоштани сатҳи некӯаҳволии мардум пайваста тадбирҳои гуногун амалӣ мегардад.

Махсусан дар панҷ соли охир маблағгузории соҳаҳои маориф аз буҷети давлатӣ 2,3 баробар ва тандурустӣ 2,1 баробар зиёд шуда, соли 2017 нисбат ба соли 2016 мутаносибан 16 фоиз ва 25 фоиз афзоиш ёфтааст.

Бори охирин Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Паёми худ ба Маҷлиси Олии Ҷумҳурии Тоҷикистон санаи 22 декабри соли 2017 вобаста ба зиёд намудани музди меҳнати кормандони соҳаи буҷетӣ суханронӣ намуда, аз ҷумла таъкид намуданд:

“Бо дарназардошти рушди иқтисодиёти мамлакат ва имкониятҳои имрӯзаи молиявӣ аз 1-уми сентябри соли 2018 музди меҳнати кормандони соҳаҳои буҷетӣ зиёд карда мешавад. Аз ҷумла, музди меҳнати кормандони мақомоти ҳокимият ва идоракунии давлатӣ, муассисаҳои маориф, илм, фарҳанг, варзиш, тандурустӣ, муассисаҳои соҳаи ҳифзи иҷтимоӣ ва дигар ташкилоту муассисаҳои буҷетӣ 15 фоиз, инчунин, музди меҳнати кормандони мақомоти ҳифзи ҳуқуқ ва хизматчиёни ҳарбӣ 10 фоиз зиёд карда мешавад. Ҳадди ақал ва ҳадди ниҳоии нафақа аз рӯи синну сол ва нафақаи заминавӣ, инчунин, нафақаҳои меҳнатии шаҳрвандон ба ҳисоби миёна то 15 фоиз, стипендияи донишҷӯён ва дигар намудҳои стипендия 15 фоиз зиёд карда мешавад”.

Санаи 14 августи соли ҷорӣ, фармони Президенти Ҷумҳурии Тоҷикистон дар бораи тадбирҳои тақвият бахшидани сатҳи ҳифзи иҷтимоии аҳолӣ ва зиёд намудани маоши амалкунандаи вазифавии хизматчиёни давлатӣ, кормандони муассисаю ташкилотҳои буҷетӣ, андозаи нафақа ва стипендия ба тасвиб расида, аз 1-уми сентябр музди меҳнати кормандони соҳаи буҷетӣ зиёд мегардад.

Дарвоқеъ, Президенти кишвар дар ҳар баромади хеш аз дастгириву ғамхорӣ ба аҳли ҷомеаи кишвар мужда медиҳанд, ки ин аз ҷониби сокинони мамлакат бо дилгармии хос истиқбол гирифта мешавад.

Афзун гардидани музди меҳнатро кормандони соҳаи маориф яке аз ғамхориҳои навбатии наҷибонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон медонанд.

“Бениҳоят хуб аст, ки аз тарафи Президенти кишвар муҳтарам Эмомалӣ Раҳмон пайваста ба соҳаи маориф таваҷҷуҳи махсус зоҳир гардида, дар баробари дигар соҳаҳои муҳим дар пайи ҳар иқдоми навбатӣ ба ин соҳаи муҳим низ диққати хосса равона мегардад. Зиёд гардидани музди меҳнати кормандони соҳаи маориф, махсусан мо-омӯзгорон иқдоми хуби навбатии Пешвои миллат буд, ки он аз ҷониби омӯзгорон бо хушнудӣ истиқбол гардид. Мо омӯзгорон - аз дастгириву ғамхории Президенти кишвар пайваста бархӯрдорем ва ҷавобан ба ин ҳама ғамхориҳо ваъда медиҳем, ки тамоми саъю кӯшиши худро баҳри босаводу ботарбия гардидани насли ҷавон равона намуда, саҳми худро дар рушду нумӯи кишвари азизамон Тоҷикистон мегузорем. Ҳар як сокини кишвар бояд ба қадри ин ҳама ободӣ, бунёдкорӣ ва оромию осоиштагӣ расида, баҳри боз ҳам тараққӣ ёфтани соҳаҳои гуногун ҷаҳду талош намояд,” - иброз дошт омӯзгор Баракатуллои Мирзоқаюм.

Ҳар сол аз буҷети давлат барои соҳаҳои гуногун маблағҳои муайян ҷудо карда мешавад. Бино ба иттилои Вазорати молияи Ҷумҳурии Тоҷикистон сиёсати хароҷоти буҷети давлатӣ пеш аз ҳама ҷиҳати таъмини уҳдадориҳои давлат дар самти ҳифзи иҷтимоии аҳолӣ, аз ҷумла пардохти музди меҳнати кормандони муассисаю ташкилотҳои буҷетӣ, нафақа, пардохти идрорпулӣ, ҷубронпулӣ, кӯмакпулии иҷтимоӣ, мустаҳкам намудани базаи моддию техникии муассисаю ташкилотҳои соҳаи иҷтимоӣ ва амнияти давлатӣ нигаронида шуда, хароҷоти маблағҳои буҷети давлатӣ дар доираи иҷроиши воқеии даромадҳои буҷетӣ дар давраи ҳисоботӣ ба роҳ монда шуда, ба соҳаҳои иқтисоди миллӣ зиёда аз 9,5 млрд. сомонӣ равона гардидааст.

Дар нимсолаи якуми соли 2018 барои пардохти музди меҳнат зиёда аз 2,2 млрд. сомонӣ, инчунин барои идрорпулӣ, нафақа, ҷубронпулӣ ва кӯмакпулиҳо 1,2 млрд. сомонӣ пардохт гардида, хусусияти иҷтимоии хароҷоти буҷети давлатӣ дар давраи ҳисоботӣ низ нигоҳ дошта шуда, ба соҳаҳои иҷтимоии кишвар аз ҳисоби буҷети давлатӣ зиёда аз 4,0 млрд. сомонӣ ҷудо шудааст.

Ибодат Давлатова, корманди Агентии миллии иттилоотии Тоҷикистон “Ховар” дар ин маврид гуфт: “Зиёд шудани маоши кормандони соҳаҳои буҷавӣ дар мамлакат ин пеш аз ҳама самараи ҳадафҳои дарпешгузоштаи давлату Ҳукумати Тоҷикистон мебошад, ки таҳти роҳбарии Сарвари давлат муҳтарам Эмомалӣ Раҳмон муҳайё гардид. Зеро яке аз ин ҳадафҳо таъмини зиндагии арзанда ва бо ҷойи кори шоиста таъмин намудани аҳолӣ мебошад ва Тоҷикистон сол аз сол дар ин самт қадамҳои устувор гузошта истодааст.

Қобили қайд аст, ки кӯшиш ва тадбирҳои пайвастаи Ҳукумати кишвар баҳри он нигаронида шудааст, ки зиндагии сокинони кишвар боз ҳам беҳтар гардад.

“Аз зиёд гардидани музди меҳнат табиист, ки ҳар як корманд хушнуд мешавад, бахусус кормандони соҳаи тандурустӣ. Зеро ба ҳама маълум аст, ки табибон, умуман кормандони соҳаи тиб ба рӯзҳои истироҳатию иду ҷашнҳои гуногун нигоҳ накарда, пайваста дар паи солимии мардум ҳастанд. Баланд гардидани музди меҳнат ин қадр гардидани заҳмати шабонарӯзии кормандон аз ҷониби давлату Ҳукумат мебошад. Мо ҷавобан ба ин ҳама ғамхорӣ ва дастгириҳо кору фаъолияти назаррас намуда, баҳри пешрафти соҳаи хеш ва дар ин замина барои рушди кишвар саҳм хоҳем гузошт”, - афзуд Мастура Мирзоева, корманди соҳаи тиб.

Тамоми иқдоми неку наҷибонаи Президенти кишвар бо мақсади беҳтар намудани вазъи моддии аҳолӣ ва хуб гардидани сатҳи зиндагии мардум мебошад. Аз ин рӯ, ҳар як мо сокинони кишварро лозим аст, ин ҷавобан ба ин ҳама ғамхориҳо самаранок кору фаъолият намуда дар рушду нумӯи кишвари азизамон Тоҷикистон саҳми арзандаи хешро гузоранд. Зеро обод намудану саҳмгузор будан дар пешрафти кишвар қарзи шаҳрвандии ҳар яки мо ба ҳисоб меравад.