Ҳадафу мароми ҳар як қонуни таҳия ва қабулгардида барои ба танзим даровардани муносибатҳои ҷамъиятӣ ва баланд бардоштани маърифати ҳуқуқии одамон пешбинӣ мешавад. Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” барои баланд бардоштани ҳисси ватандорию ватандӯстӣ таҳия шудааст. Атрофи ин қонун бо Низорамоҳ Бобоева, номзади илмҳои ҳуқуқ, дотсенти кафедраи ҳуқуқи инсон ва ҳуқуқшиносии муқоисавии факултети ҳуқуқшиносии ДМТ суҳбат намудем.

- Ба андешаи шумо чӣ зарурат пеш омад, то Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” таҳия ва қабул гардад?

- Ҳадафу принсипи асосии Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” ин муқаррар кардани асосҳои ҳуқуқӣ, ҳамчунин муайян кардани муносибатҳои вобаста ба ташкили заминаҳои ҳуқуқӣ, иҷтимоӣ, иқтисодӣ, ташкилӣ, таъмин ва танзими фаъолият дар соҳаи тарбияи ватандӯстии шаҳрвандон мебошад. Зарурати таҳия ва қабули қонун боз ҳам баланд бардоштани ҳисси миллии ватандӯстию ватандории шаҳрвандон, ҳамчунин баланд бардоштани сатҳи маърифати ҳуқуқии шаҳрвандон мебошад. На ҳар қавму миллат ҳисси баланди миллӣ дорад.

- Заминаҳои ҳуқуқие, ки дар қонуни мазкур оварда шудааст, рушди низоми тарбияи ватандӯстиро таъмин месозад?

- Албатта, таъмин месозад. Зеро тамоми заминаҳои ҳуқуқӣ дар қонуни мазкур оварда шудааст. Маҳз ин қонун ба таври равшану возеҳ кор бо шаҳрванд, аз қабили дӯст доштани Ватан, эҳтиром ба арзишҳои миллӣ, инчунин пуштибонӣ аз манфиатҳои милливу хизмати ҳарбиро ба ҷавонон таблиғ ва онҳоро дар ин руҳия тарбия менамояд.

- Ояндаи дилхоҳ давлату миллат аз ҷавонон вобастагии амиқ дорад. Агар ҷавонон ватандӯст бошанд, пас метавон ояндаи он миллату давлатро рӯшан арзёбӣ кард. Имрӯз ҷавонони мо то куҷо ватандӯстанд ва қабули ин қонун дар баланд бардоштани эҳсоси ватандӯстии онҳо чӣ нақш гузошта метавонад?

- Ҷавонони мо ҷавонони бонангу номусанд. Ҳисси ватандӯстии ҷавонони мо сол аз сол зиёд гардида истодааст. Инро мо дар мисоли ҳифзи марзҳои миллӣ ҳангоми муноқишаҳо эҳсос кардем. Равшану возеҳ маълум гардид, ки ҳар як ҷавон бо доштани ҳисси баланди ватандӯстӣ мехоҳад, такягоҳ ва сипари боэътимоди давлату миллат бошад. Барои баланд бардоштани ҳисси ватандӯстии ҷавонон, умуман шаҳрвандон, ин қонун нақши калидӣ дорад. Яъне, дар доираи ин қонун мақомоти давлатӣ, ташкилотҳо, инчунин, дигар муассисаҳо дар самти тарбияи ватандӯстии ҷавонон муваззаф гардидаанд, ки иҷрои талаботҳои қонуни мазкурро дар ҷомеа таъмин намоянд.

- Оё метавон гуфт, ки қабули чунин қонунҳо барои меҳанпарасту меҳандӯст шудани аҳли ҷомеа таъсиргузор аст? Ва қонуни мазкур дар ин росто оё то имрӯз таъсиргузор гардид?

- Аҳли ҷомеаи моро метавон меҳанпарасту меҳандӯст унвон дод. Аммо барои боз ҳам баланд бардоштани ҳисси меҳандӯстиву меҳанпарастӣ қабули қонуни мазкур заминагузор буда метавонад. Бо боварии комил гуфта метавонем, ки ҳар як шаҳрванд саъю кӯшиш менамояд, ки дар мувофиқа бо меъёрҳои қонуни номбурда амал кунад.

- Оё кулли механизми лозима дар самти тарбияи ватандӯстии шаҳрвандон дар ин қонун зикр гардидааст?

- Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” ин худ як механизм аст. Механизме, ки дар доираи он ҳуқуқ, қонун ва тартибот дар давлату ҷамъият амал мекунад. Яъне, дар қонуни мазкур кулли механизмҳои лозима дар самти тарбияи ватандӯстии шаҳрвандон зикр гардидааст.

- Чӣ чизҳои муҳими дигаре ҳаст, ки дар қонуни мазкур дида намешавад ва илова кардани онҳо боз ҳам ба манфиати кор хоҳад шуд?

- Дар умум ягон қонуне нест, ки дар он нуқсон ё камбудӣ дида нашавад. Кам ҳам бошад, дар дохили меъёрҳо нуқсонҳо дида мешавад. Дар асоси пешниҳодҳои шаҳрвандони дохили ҷумҳурӣ ва берун аз он қонунҳои таҳияшуда метавонанд, мустаҳкамтар шуда, такмил ёбанд.

- Сарфи назар аз қонунҳои махсус дар ин росто аҳли ҷомеа ватандӯстии худро чӣ гуна бояд тақвият бахшанд ва ба кӣ метавон унвони ватандӯст дод?

- Ба андешаи ман ватандӯст он шахсест, ки дили пок ва нияти пок ба Ватан – Модар, ҳамчунин ҳар он чизе, ки дар Тоҷикистон муқаддас аст, дорад. Ҳар як шахсе, ки барои пешрафти кишвари азизамон саҳме мегузорад, ватандӯст унвон дода мешавад. Ҷавонон бояд имрӯз кишварро бо ҷону дил дӯст доранду барои ҳифзи он ҳамеша омода бошанд.


Суҳбати Таҳмина ЮСУФӢ, “ҶТ”