Нақшаи даъвати ҳарбии тирамоҳӣ ба сафи Қувваҳои Мусаллаҳи Ҷумҳурии Тоҷикистон то рӯзи 16 ноябри соли ҷорӣ дар кишвар пеш аз муҳлат пурра иҷро шуд.

Дар ин бора Вазорати мудофиаи кишвар хабар додааст.

Бино ба иттилои манбаъ, дар нахустин Рӯзи даъватшаванда вилояти Хатлон, ВМКБ, ноҳияҳои минтақаи Рашт ва пасон шаҳри Душанбе аз пурра иҷро намудани нақшаи даъват ба хизмати ҳатмии ҳарбӣ гузориш дода буданд.

- Дар даъвати тирамоҳии имсола шумораи шаҳрвандони ихтиёрӣ нисбат ба солҳои пешин ниҳоят зиёд буда, бештари довталабони хизмати ҳарбиро ҷавонписарони дорои маълумоти олӣ, фарзандони шахсони мансабдор ва хатмкардагони Муассисаи давлатии “Мададгори мудофиа”-и Вазорати мудофиа, ки асосан мутахассисони касбу соҳаҳои гуногунро барои Қувваҳои Мусаллаҳ омода менамояд, ташкил медиҳанд, - омадааст дар иттилоия.

Ба таъкиди манбаъ, ҳарчанд нақшаи даъвати ҳарбӣ 100 фоиз иҷро гардида бошад ҳам, вале бо мақсади баррасӣ намудани муроҷиати шаҳрвандон фаъолияти мақомоти масъули вобастаи ин чорабинии муҳими сиёсӣ ё худ комиссияҳои даъватӣ то охири моҳи ноябри соли равон идома меёбад.

Бояд ёдовар шуд, ки нақшаи даъвати баҳории соли ҷорӣ низ пеш аз муҳлат дар тамоми шаҳру навоҳии кишвар пурра иҷро гардида буд.

Ҷасури ҚИЁМИДДИН, “ҶТ”