7-уми май бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикстон ва Иттифоқи ҷавонони Тоҷикистон дар Осорхонаи миллии кишвар конференсияи байналмилалӣ таҳти унвони “Нақши ҷавонон дар татбиқи ташаббусҳои ҷаҳонии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти обу иқлим ва ҳифзи пиряхҳо” баргузор гардид.

Дар чорабинии мазкур намояндагони вазорату идораҳои гуногуни давлатӣ иштирок ва суханронӣ намуданд.

Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни баромади хеш иброз дошт, Ҷумҳурии Тоҷикистон ташаббускори ҳалли масъалаҳои обу иқлим ва ҳифзи пиряхҳо буда, ҷомеаи ҷаҳонӣ аз иқдомҳои ду даҳсолаи охири Тоҷикистон, ки барои наҷоти башарият равона гардидааст, пазироӣ намуда, пуштибонӣ мекунад.

Таъкид гардид, ки бо муҳиммияти ин масъала бори дигар 3 марти соли 2021 Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқоти якуми Панели сатҳи баланд оид ба масъалаҳои об ва иқлим, ки дар шакли видеоконференсия баргузор гардид, иштирок ва оид ба масъалаҳои об ва иқлим суханронӣ намуданд.

Инчунин, дар конференсия гуфта шуд, ки аз рӯи таҳлили коршиносон солҳои охир пиряхҳои Тоҷикистон босуръат об шуда истодаанд ва то имрӯз аз 14 ҳазор пирях зиёда аз ҳазортоаш комилан об шудааст. Тайи чанд даҳсолаи охир ҳаҷми умумии пиряхҳои кишвари мо, ки зиёда аз 60%-и захираҳои обии минтақаи Осиёи Марказиро ташкил медиҳанд, ба андозаи тақрибан сеяк баробар кам гардидааст. Мутобиқи ҳисоботи пешакӣ то соли 2030 зиёдшавии истифодабарии об дар Осиёи Марказӣ 15- 20% -ро ташкил медиҳад.

Дар идома дигар маърӯзачиён низ вобаста ба ташаббусҳои ҷаҳонии Тоҷикистон суханронӣ намуданд.

Малика МУҚАДАМОВА, “ҶТ”