Истиқлолият тавонист барои зани тоҷик озодандешӣ, зиндагонии шоиста ва имконияти муфид фароҳам орад. Дар замони истиқлолият занон тавонистанд дар дилхоҳ соҳа кору фаъолият намоянд. Имрӯз занон дар ҷомеаи Тоҷикистон, ки зиёда аз 51 фоизи аҳолиро ташкил медиҳанд, дар пешрафти соҳаҳои мухталифи хоҷагии халқи мамлакат нақши муассир мебозанд.

Бо шарофати ба қудрати сиёсӣ расидани муҳтарам Эмомалӣ Раҳмон барномаҳои зиёди давлатӣ оид ба баланд бардоштани мавқеи зан дар ҷомеа роҳандозӣ гардид. Дар Паёми ахири худ Пешвои миллат муҳтарам Эмомалӣ Раҳмон ба мақоми занон дар ҷомеа таъкид намуда, мавқеи онҳоро дар татбиқи сиёсати иҷтимоии давлат муҳим арзёбӣ карданд. Инчунин дар суханрониҳо ва паёмҳои ҳарсолаашон ба масъалаи баланд бардоштани мавқеи зан дар ҷомеа таваҷҷуҳи хосса зоҳир мекунанд.

Ҳоло дар ҷумҳуриамон фаъолияти занон дар соҳаҳои маориф, тандурустӣ, соҳибкорӣ, фарҳанг бештар буда, дар корҳои давлатӣ низ сол то сол шумораи онҳо меафзояд. Зиёда аз 73 фоизи кормандони соҳаи маориф, беш аз 68 фоизи соҳаи тандурустӣ ва ҳифзи иҷтимоӣ ва 51 фоизи кормандони соҳаи фарҳангро занон ташкил медиҳанд.

Тибқи иттилои Кумитаи кор бо занон ва оилаи назди Ҳукумати Ҷумҳурии Тоҷикистон дар тӯли 30 соли истиқлолият, яъне аз соли 1991 то инҷониб 8 нафар зан ба ҳайси муовинони Сарвазири Ҷумҳурии Тоҷикистон, 1 нафар зан ба ҳайси Роҳбари Дастгоҳи иҷроияи Президенти Ҷумҳурии Тоҷикистон, 9 нафар ба ҳайси вазир ва 13 нафар роҳбарони аввали кумитаву идораҳои назди ҳукумат таъин гардида, ҳамзамон, занон ба ҳайси раиси суди олии иқтисодӣ ва сардори хадамоти иҷро фаъолият намуда истодаанд. Дар як соли охир зиёда аз 30 нафар занону духтарони лаёқатманд ба вазифаҳои роҳбарикунанда таъин гардидаанд.

Тибқи маълумоти Агентии хизмати давлатии назди Президенти Ҷумҳурии Тоҷикистон аз 1 июли соли 2021 дар соҳаи хизмати давлатӣ аз шумораи умумии 19176 нафар хизматчиёни давлатии амалкунанда 4486 нафар, ё 23,4%, аз шумораи умумии 5910 нафар кадрҳои роҳбарикунанда 1148 (19,4%) нафарро занон ташкил медиҳад.
Зан - бонуи тоҷик муборизи қавиирода аст. Ҳамин аст, ки Сарвари давлат бо дарки амиқи ин нуктаи басо муҳим ҳуқуқи зан-ро эътироф ва мақому манзалати вайро дар ҷомеа батадриҷ меафзоянд.

Ба андешаи Маҳбуба Азимова, корманди Кумитаи кор бо занон ва оила аз он рӯзе, ки муҳтарам Эмомалӣ Раҳмон ба арсаи сиёсат қадам ниҳоданд, ба неруи занҳои оқилу соҳибмаърифати тоҷик бовар доштанд. “Аз ҳамон рӯзҳои аввали соҳибистиқлолӣ қайд карданд, ки: “Ҷомеае, ки ба зан - модар эътимод дорад, ҷомеаи пешрафта аст”. Аз ин лиҳоз, аввалин маротиба тибқи Квотаи президентӣ соли 1996 аз деҳаҳои дурдаст овардани духтарони болаёқат, ки дар мактабҳои миёна бо баҳои хубу аъло мехонданд, таваҷҷуҳ зоҳир намуда, дастур доданд, ки онҳоро тариқи пурсиш ба мактабҳои олӣ қабул намоянд. Ҳамаи ин далели он мебошад, ки мавқеи зан - бонуи тоҷик дар ҷомеа чашмрас мегардад”, - гуфт, М. Азимова.

Агар мо саҳифаҳои таърихро варақгардон кунем, мефаҳмем, ки зани тоҷик фарҳангпарвар аст, сиёсатмадор аст, илмдӯсту хирадманд ва ҳунарманду кордон аст. Нақшаш дар ҳама соҳаҳо назаррас аст. Заминаи бофарҳангу ватанпарвар будани зани тоҷик аст, ки имрӯз дар ҳамаи соҳаҳои калидӣ иштироки фаъоли занон дида мешавад. Тибқи таҳлилҳо дар Тоҷикистон ҷалби занону духтарон ба корҳои давлатию ҷамъиятӣ нисбати дигар ҷумҳуриҳои собиқи шӯравӣ ҷои намоёнро ишғол менамояд.