19 август дар Боғи фарҳангӣ - фароғатии ба номи Садриддин Айнии шаҳри Душанбе намоиш - фурӯши маҳсулоти кишоварзӣ, саноатӣ, ҳамчунин намоиши ҳунарҳои мардумӣ, таомҳои миллии ҳунармандону сокинон ва кишоварзони меҳнатдӯсти ноҳияи Деваштичи вилояти Суғд баргузор гардид.

Дар чорабинии мазкур Сулаймон Зиёзода, муовини Сарвазири кишвар, Қурбон Ҳакимзода, вазири кишоварзии мамлакат, Сураҷ Чоршанбезода, муовини раиси Кумитаи кор бо ҷавонон ва варзиш, роҳбарияти мақомоти иҷроияи ҳокимияти давлатии шаҳри Душанбе, ноҳияҳои Исмоили Сомонӣ ва Деваштич ширкат варзиданд.

Дар оғози чорабинӣ меҳмононро гулдухтарон ва гурӯҳи ҳунармандон бо шеъру суруд пешвоз гирифтанд. Сипас, меҳмонон бо намунаи ҳунарҳои мардумии ноҳия, намунаи таомҳи миллӣ ва ҳамчунин бо дастовардҳои дигари ноҳияи Деваштич ошно гардида, ба ҳунари онҳо баҳои баланд доданд.

Чуноне ки Мирзо Мирзозода, сардори Раёсати кишоварзии ноҳияи Деваштич қайд намуд: “Мақсад аз баргузории намоиши мазкур ба маърази тамошои аҳолии пойтахти кишвар – шаҳри Душанбе гардонидани маҳсулоти кишоварзӣ ва ҳунарҳои мардумии ноҳияи Деваштич буд. Дар чорабинии мазкур зиёда аз 100 тонна маҳсулотҳои кишоварзӣ аз ҷониби деҳқонон ва масъулини самти кишоварзии ноҳия ба намоиш гузошта шуд. Аз ҷумла ба ин маҳсулотҳо картошка, пиёз, сабзӣ, тарбуз, харбуз ва мевагиҳо шомил буданд”.

Гулафшон КАРИМОВА, Ҳошим РАҲМАТУЛЛОЕВ, “ҶТ”