Ба ифтихори “Солҳои рушди деҳот, сайёҳӣ ва ҳунарҳои мардумӣ” дар Маҷмааи варзишии шаҳри Хоруғ намоиши ҷумҳуриявии дастовардҳои ҳунарию меъморӣ, шаҳрсозӣ ва масолеҳи сохтмонии ватанӣ баргузор гардид.

Чорабинӣ бо иқдоми Кумитаи меъморӣ ва сохтмони назди Ҳукумати Ҷумҳурии Тоҷикистон баргузор шуда, дар он ҳунармандони инфиродии шаҳру ноҳияҳои мамлакат, роҳбарони ташкилотҳои ҷамъиятӣ, масъулину кормандони корхонаҳои хурду бузурги саноатӣ, коргоҳҳои кандакорию кулолгарӣ, ресандагӣ, бофандагӣ, гаҷкорӣ ва наққошӣ иштирок намуданд.

Раиси ВМКБ Ёдгор Файзов ва раиси шаҳри Хоруғ Кишвар Шамирӣ ҳини ифтитоҳи намоишгоҳ бо ҳозирин суҳбату озоду самимӣ доир намуданд.

Аз ҷумла қайд гардид, ки проблемаи бекорӣ дар сатҳи вилоят ҳанӯз ҳам аз мушкилоти мубрам ба шумор рафта, маҳз бо бунёду азнавсозии корхонаҳои хурду калон ва дигар муассисаҳои мавриди ниёзи мардум он марҳила ба марҳила коҳиш меёбад.

“Маҳз ташаббуси хирадмандонаи Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон буд, ки яке аз бузургтарин неругоҳҳои минтақа – НБО – и Роғун бунёд гардида, ду агрегати он мавриди баҳрабардорӣ қарор гирифтанд. Феълан соҳибкорони моро мебояд, ки бозори дохилиро бо масолеҳи сохтмонии воридотӣ таъмин намоянд. Зеро дар Тоҷикистон қариб ҳама гуна масолеҳ, маъдану сангҳои қиматбаҳо мавҷуд аст ва барои бомаром ба кор андохтани онҳо талоши ҳамагон зарур аст” – иброз намуд Ёдгор Файзов.