ё чаро ДДБ ба номи Н. Хусраву БДА “Амонатбонк” ба ҷуз ду филиали шаҳри Бохтар ба дигар филиалҳои минтақавии вилоят бовар надоранд?

Чанд рӯзи охир дидани анбӯҳи одамон, аз ҷумла навбатпоии садҳо нафар ҷавонони довталаб ва волидайни онҳо дар назди филиалҳои рақамҳои 42, 43-и Бонки давлатии амонатгузории Тоҷикистон “Амонатбонк” дар шаҳри Бохтар, ки барои супоридани маблағи шартномаи Донишгоҳи давлатии Бохтар ба номи Носири Хусрав овораву саргардонанд, боиси нигаронии мардум гардидааст.

Дар ин рӯзҳо, ки саросари ҷаҳонро бемории сироятии COVID-19 фарогир асту пайваста ҷиҳати риояи ҳатмии қоидаҳои беҳдоштӣ аз ҷониби мутахассисон маслиҳатҳо дода мешавад, вале боз ҳам мушоҳидаи теъдоди зиёди одамон дар назди бонкҳо суолҳои зиёд ба бор меорад. Оё соатҳои зиёд паси ҳам истодани мардум дар гармои тобистон боиси паҳншавии ин беморӣ шуда наметавонад? Чаро барои иҷрои одитарин амалиёти бонкӣ, яъне маблағи мизоҷон ба қавле бонки асосии кишвар ин қадар мушкилиҳо эҷод мекунад? Пас аз куҷо мизоҷони воқеии бонкҳо ба шаффофияту фаъолияти оҷилию саривақтии бонкҳо эътимод пайдо намоянд?

Қобили зикр аст, ки дар даврони соҳибистиқлолии кишвар вобаста ба рушду пешрафти тамоми самтҳо Ҳукумати мамлакат, бахусус Сарвари давлат муҳтарам Эмомалӣ Раҳмон ба фаъолияти бонизоми соҳаи бонкдорӣ таваҷҷуҳи махсус зоҳир карда, барои фароҳам сохтани хизматрасониҳои бонкӣ то дар дурдасттарин деҳоти мамлакат дастуру супоришҳои қатъӣ додааст. Аммо дар ин шабу рӯз норозигии муштариён барои рӯзи дароз дар навбат истодану хизматрасониҳои сусти кормандони бонки амонатгузории “Амонатбонк” ба нуфузу обрӯи бонки давлатӣ таъсири манфӣ расонидааст. Ин дар ҳолест, ки имрӯз дар ҳудуди минтақаи Бохтари вилояти Хатлон 14 филиал ва 100 марказҳои хизматрасонии Бонки давлатии амонатгузории Тоҷикистон “Амонатбонк” арзи вуҷуд доранд, ки дар онҳо садҳо нафар кору фаъолият менамоянд.

Дар ҳамин ҳол масъулини филиали №42 - и Бонки давлатии амонатгузории Тоҷикистон “Амонатбонк” дар шаҳри Бохтар бо асабонияту изтироб изҳор медоранд, ки ба ин тартиб қабули маблағҳои шартномаи донишҷӯёнро маҳз мудирияти Донишгоҳи давлатии Бохтар ба номи Носири Хусрав ба миён гузоштааст. Ҳол он ки ба гуфти бонкдорон онҳо омодаанд, ки дар дилхоҳ филиалу марказҳои хизматрасонии худ ин гуна амалиётро дар сатҳи беҳтару хубтар ба роҳ монанд.

Сокинони шаҳру навоҳии гуногуни вилоят ва дигар манотиқи кишвар бо дилсардӣ аз чунин сатҳи хизматрасониву фаъолияти бонкдорӣ иброз медоранд, ки барои як амалиёти одии бонкӣ чанд рӯз аз кору фаъолияти худ дур монда, назди бонк навбатпоӣ доранд. Раҳима Эргашова, сокини шаҳри Кӯлоб, рӯзи дувум аст, ки аз субҳи барвақт дар навбат истодааст, аммо бинобар зиёд будани маблағсупорандагон наметавонад маблағи шартномаи таҳсили фарзандашро пардохт намояд. Ба гуфти ӯ агар бонки мазкур ҳамин амалиёти бонкиро ба филиали дар шаҳри Кӯлоб будаи худ иҷозат медод, ин қадар сокинони шаҳру ноҳияҳои минтақаи Кӯлоб сарсону саргардон намешуданд. Охир филиалҳои бонкҳо ба кадом хотир таъсис дода шудаанд, вақте ки мардум барои одитарин амалиёти бонкӣ аз ҳар минтақа ба маркази вилоят меоянд?

Ба андешаи сокини дигари вилояти Хатлон Юсуфҷон Шарафов бинобар аз меъёр зиёд будани мизоҷон дар назди филиали № 42 ношаффофии раванди хизматрасонӣ ҳам мушоҳида мегардад. Ба гуфтаи ӯ ҳар нафаре бо роҳу воситаҳои гуногун кӯшиш мекунад, барвақттар роҳи ҳалли мушкилоти худро пайдо кунад. Бояд гуфт, ки ин мушкилоти эҷодгардида дар мавриди пардохти маблағи шартномаи таҳсил танҳо барои довталабони Донишгоҳи давлатии Бохтар ба номи Носири Хусрав ҷой дорад. Мутаассифона, роҳбарияти донишгоҳ қазияи мазкурро нодида гирифта, исрор менамоянд, ки барояшон фарқе надорад, ки довталаб маблағи шартномаашро дар кадом филиал месупорад, муҳимаш он, ки расиди онро сари вақт барояшон дастрас намоянд.

Тибқи иттилоъ донишгоҳи номбурда дорои 19 ҳазору 615 нафар донишҷӯ мебошад, ки танҳо аз ҳисоби шуъбаи рӯзона 6 ҳазору 74 нафар тариқи шартномавӣ таҳсил менамоянд. Теъдоди нафарони имсол ба донишгоҳ дохилгардида бошад ҳоло мушаххас нест.

Мавриди зикр аст, ки дар солҳои аввали ба фаъолият шурӯъ намудани Маркази миллии тестии назди Президенти Ҷумҳурии Тоҷикистон ҳам чунин манзара, яъне талотуму навбатпоии тӯлонии мардум дар назди донишгоҳ, мушоҳида мешуд. Ва он мушкили баҳсбарангез маҳз бо дахолату мусоидати бевоситаи Роҳбари давлат роҳи ҳалли худро пайдо намуд.

Дар ҳамин ҳол сокинон итминон доранд, ки мушкили пардохти маблағҳои донишҷӯён роҳи ҳалли худро дорад, аммо масъулон дар ин маврид хостаҳои мизоҷонро сарфи назар намудаанд. Ҳамин тариқ, филиали №42-и БДА “Амонатбонк” дар шаҳри Бохтар ба хотири талаботҳои бемантиқи ДДБ ба номи Носири Хусрав эътимоду боварии мардумро нисбат ба сатҳи сифати хизматрасонии бонкӣ аз даст дода истодааст.

Тавре коршиносони масоили иҷтимоӣ иброз медоранд, набояд бонкҳо ва муассисаҳои таҳсилоти олии кишвар ба хотири манфиати нақду хостаҳои мавсимии худ талаботу ҳуқуқҳои мардум ва муштариёнро нодида бигиранд. Ҳол он ки бо ҷалби мутахассиси одии соҳаи технологияи электронӣ метавон амалиёти пардохти шартномаи донишҷӯро ҳам тариқи электронӣ ба роҳ монд. Чаро оид ба ҷорӣ намудани ин гуна амалиётҳо масъулони бонки мазкур тасмим нагирифтаанд суолест, ки посухашро аз роҳбарияти Бонки давлатии амонатгузории Тоҷикистон “Амонатбонк” интизорем.

Ба гуфтаи коршиносони соҳа роҳи дигари аз байн бурдани мушкилоти баамаломада ин тариқи дигар бонкҳо ба роҳ мондани пардохти шартномаи донишҷӯён мебошад, ки номаълум аст, тарафҳо розӣ шуда метавонад ё не? Аммо муштариён розианд, ки бо фоизи баландтар ҳам бошад, ҳарчи зудтар маблағи шартномаи таҳсили фарзандонро пардохт намуда, аз пайи кору зиндагии хеш бошанд.

Хулоса, овораву саргардон намудани мардум дар шабу рӯзи пардохтҳои шартномаи донишҷӯён ва рӯзҳои гирифтани музди маош аз терминалҳо аз мавзӯи доғи рӯз маҳсуб меёбад, ки ҳаллу фасли худро мехоҳад. Дар фарҷом ба масъулон бо чунин суол муроҷиат мекунем, ки оё филиали №42-и БДА “Амонатбонк” дар вилояти Хатлон ва ДДБ ба номи Носири Хусрав барои ҷамъоварии маблағи шартномаи донишҷӯён, лоақал ба филиалҳои дар дигар шаҳру ноҳияҳо будаи бонки мазкур боварӣ надоранд ё мушкил ҷои дигар аст?”