Соли 2022 дар Ҷумҳурии Тоҷикистон 695 никоҳи бармаҳал ба қайд гирифта шудааст, ки ин шумора нисбати соли гузашта беш аз 100 ҳолат зиёд аст. Дар ин бора 16 феврал Саодат Сироҷзода, сардори Раёсати асноди ҳолати шаҳрвандии Вазорати адлияи Ҷумҳурии Тоҷикистон зимни нишасти хабарӣ иттилоъ дод.

Ӯ зикр кард, ки аз ин шумора 238 ҳолат дар вилояти Хатлон, 163 ҳолат дар вилояти Суғд, 136 ҳолат дар Душанбе ва 158 ҳолат дар ШНТҶ ба қайд гирифта шудааст. Ҳолатҳои никоҳи бармаҳал дар ВМКБ ба қайд гирифта нашудааст.

Таъкид гардид, ки дар Ҷумҳурии Тоҷикистон соли гузашта 74 ҳазору 863 ақди никоҳ баста шуда, аз ин шумора 13 ҳазору 714 ақди никоҳ бекор карда шудааст.

Сироҷзода таъкид намуд, ки дар вилояти Суғд аз ҳама бештар бекор кардани ақди никоҳ ба қайд гирифта шудааст, ки шумораи он 4302 ададро ташкил медиҳад. Инчунин дар вилояти Хатлон 3607 ҳолат, ШНТҶ 3311, шаҳри Душанбе 2430 ва дар ВМКБ 226 ҳолати бекоршавии ақди никоҳ сабт шудааст.

- Инчунин дар ноҳияҳои Бобоҷон Ғафуров, Ашт, Исфара, Хуҷанд, Кӯшониён, Кӯлоб, Бохтар, Абдураҳмони Ҷомӣ, Сино, Ваҳдат ва Ҳисор ҳолатҳои бекор кардани ақди никоҳ бештар ба қайд гирифта шудааст, - илова намуд номбурда.

Инчунин закр гардид, ки 10 ҳазору 893 бекоршавии ақди никоҳ бо қарори судҳои шаҳру ноҳияҳо 2900 бо аризаи якҷояи мушатраки зану шавҳар ва 83 адад бо аризаи яке аз ҳамсарон сурат гирифтааст.