- Дар ҳолати кунунӣ рӯзноманигорон дар ҳаёти сиёсӣ, иҷтимоӣ, фарҳангиву иқтисодии кишвар ва хоса таъмини сулҳу суботи сартосарӣ нақши муассир доранд, - иброз дошт иҷрокунандаи раиси ВМКБ Ёдгор Файзов зимни нишасти матбуотӣ бо хабарнигорон. - Дар ин давра пинҳон кардани мушкилоти рӯзмарра ва воқеияту ҳақиқат аз мардум ғайриимкон аст ва агар маводҳои танқидӣ бидуни тамаъкорӣ, аз рӯи адолату ба таври касбӣ ба хонандаю бинанда ё шунаванда расонида шаванд, он мувофиқи маром хоҳад буд.

Ҳамзамон раҳбарияти вилоят масъалаи бекорӣ миёни ҷавононро аз мушкилоти доғи рӯз арзёбӣ карда гуфт, ки агар аз рӯи ҳисоботи расмии оморӣ гирем, дар ҳудуди шаҳру навоҳии ВМКБ 6 000 нафар бекор ба қайд гирифта шудааст. Вале дар асл бошад ин шумора аз 30 фисад боло аст.

Зикр шуд, ки имрӯз дар идораву сохторҳои маҳаллии давлатӣ 18 ҳазор нафар сокинони вилоят бо ҷои кори доимӣ таъминанд. Аммо нисбати ҳамаи бошандагони шаҳру навоҳии бекор, ки қобили меҳнат ҳастанд, албатта ин шумор нокифоя буда, дар ин росто аз ҷониби Мақомоти иҷроияи ҳокимияти давлатии вилоят дар ҳамкорӣ бо шарикони рушд минбаъд низ тадбирҳои зарурӣ пиёда мегарданд.

Дар мавриди мувофиқи мақсад фаъолият надоштани минтақаи озоди иқтисодии Ишкошим қайд гашт, ки агарчи аз ҷиҳати ҷойгиршавии ҷуғрофиаш он беҳтарин мавзеъ аст, вале бо сабаби идома ёфтани муноқишаҳои дохилӣ дар ҳамсоякишвари Ҷумҳурии Исломии Афғонистон, ҷавбогӯ набудани роҳҳои ноҳия ба талаботи замон ва дигар сабабҳои мавҷуда соли ҷорӣ бо Қарори Ҳукумати кишвар он ба мавзеи Теми шаҳри Хоруғ кӯчонида мешавад.

Таъмини озуқаю хӯроквории дохилӣ низ аз масоили ҳалталаб дар нишаст унвон гашта, раҳбарияти вилоят махсус зикр кард, ки агарчи дар вилоят водиҳои Вахону Бартанги ноҳияҳои Ишкошим ва Рӯшон аз манбаҳои асосии кишти ғалладона дар вилоят ба ҳисоб мерафтанд, имрӯз навоҳӣ пурра аз заминҳои корам истифода намекунанд. Яъне ин дар ҳолест, ки соли гузашта худи сокинонони Рӯшон аз Агентии захираҳои моддии давлатии назди Ҳукумати мамлакат ба маблағи 360 ҳазор сомонӣ маводи ғалладона харидорӣ намуданд.

Оид ба ҳифзи ёгориҳои нодири таърихии ВМКБ ва минбаъд аз нестшавӣ эмин нигоҳ доштани он гуфта шуд, ки бинобар камчинии маблағ дар мақомоти иҷроияи вилояту шаҳр ва навоҳӣ масъала ҳалли худро наёфт. Лекин дар ҳамкорӣ бо шарикони рушд соли гузашта, минҷумла бо ибтикори Барномаи ҷонибдории инкишофи манотиқи кӯҳистони фонди Оғохон 18 адад ёдгории таърихии вилоят азнавсозӣ ва ҳифз карда шуданд.

- Ҳозир дар мавриди аз нав барқароркунии Қалъаи Ямчун ва чанд ёдгориҳои дигар бо Бонки ҷаҳонӣ гуфту шунид меравад ва ин масъала давра ба давра ҳалли худро хоҳад ёфт. Аммо мутаассифона ба арзиш ва муҳиммияти ёдгориҳо то ҳол ҳам аксарияти сокинони шаҳру ноҳияҳо сарфаҳм нарафтанд ва дар баъзе мавридҳо худашон онҳоро ба нестӣ мерасонанд, - афзуд и. в. раиси вилоят.