Мувофиқи маълумотҳои оморӣ соли 2026 ҳаҷми умумии маҳсулоти саноатии истеҳсолшуда дар ноҳияи Фирдавсӣ 970,1 млн сомониро ташкил медиҳад, ки нисбат ба ҳамин давраи соли гузашта 85,7 млн сомонӣ зиёд мебошад.

Дар ин бора 15 июл зимни нишасти матбуотии Мақомоти иҷроияи ҳокимияти давлатии ноҳияи Фирдавсӣ Дилшод Сафарзода, раиси ноҳия иттилоъ дода, гуфт, ки дар ин давра дар ҳудуди ноҳия 10 коргоҳу корхонаи нави саноатӣ расман ба ифтитоҳ ёфта, беш аз 67 ҷойи нави корӣ аз ҳисоби онҳо таъсис ёфтааст.

Дар умум, тибқи маълумоти оморӣ дар ноҳияи Фирдавсӣ 225 коргоҳу корхонаҳои саноатӣ фаъолият намуда, дар шаш моҳи соли ҷорӣ 5372 ҷойи нави корӣ таъсис ёфтааст, ки нисбат ба ҳамин давраи соли гузашта 224 ҷойи нави корӣ зиёд мебошад.

Инчунин, зикр гардид, ки дар шаш моҳи соли ҷорӣ ҳаҷми содироти маҳсулоти саноатӣ дар ноҳияи мазкур ба 10,4 млн доллари ИМА расида, нисбат ба ҳамин давраи соли гузашта 2,6 млн долар зиёд мебошад.

М. МУҚАДДАМОВА, "ҶТ"