Соли 2020 дар Ҷумҳурии Тоҷикистон ҷинояткории ноболиғон нисбати соли 2019 коҳиш ёфтааст. Дар ин бора рӯзи 4-уми феврал ваколатдори ҳуқуқи кӯдак дар Тоҷикистон, Раҷабмоҳ Ҳабибуллозода зимни нишасти хабарӣ иттилоъ дод.

Ӯ қайд намуд, ки соли 2020 аз ҷониби ноболиғон 754 ҷиноят содир гардидааст, ки нисбати соли гузашта ин шумора 119 адад камтар аст.

Ҳамзамон, ӯ ҷиноятҳое, ки аз ҷониби кӯдакон, хусусан бо силоҳи сард сурат мегиранд, нигаронкунанда хонд ва қайд намуд, ки чӣ корҳоро дар ин самт ба сомон мерасонанд.

- Нақши мо дар пешгирии ҷинояткории ноболиғон муҳим аст. Барои ҳамин мо вақте ки бо кӯдакон вомехӯрем, бобати баланд бардоштани маърифати ҳуқуқии онҳо ва кирдорҳое, ки онҳо анҷом медҳанд, чӣ оқибатҳоро ба бор меоранд, корҳои фаҳмондадиҳӣ мегузаронем. Ҳангоми вохӯрӣ дар маҳалҳо бо комиссияи ҳуқуқи кӯдак, дар ҳамкорӣ бо сохторҳои дахлдор мо масъалаҳои вобаста ба пешгирӣ намудан ва умуман муайян кардани сабабу омилҳои ҷинояткории ноболиғон корбарӣ менамоем,-иброз намуд ӯ.