Ҷанни Инфантино, президенти федератсияи байналмилалии ассотсиатсияҳои футбол (ФИФА) дастаи “Истиқлол”-и Душанберо барои пирӯзӣ дар мусобиқоти қаҳрамонии Тоҷикистон -2023 табрик намуд.

Инфантино, дар номаи шодбошии хеш, ки ба унвони президенти Федератсияи футболи Тоҷикистон, муҳтарам Рустами Эмомалӣ ирсол шудааст, самимияташро ба таври зайл баён медорад:

“Муҳтарам президент!

Ман бо камоли хушнудӣ КФ “Истиқлол” - ро барои ба даст овардани унвони қаҳрамони Тоҷикистон дар соли 2023 табрик мегӯям!

Ин унвон бешубҳа, натиҷаи меҳнату ғайрат ва фидокорист. Ҳама аъзоёни бошгоҳ метавонанд аз ин дастоварди муҳим фахр намоянд.
Лутфан табрикоти маро ба ҳамаи онҳое, ки дар ин дастоварди бузург даст доранд, расонед.

Ман аз номи ҷомеаи ҷаҳонии футбол бо истифода аз фурсат ба Шумо ва Федератсияи Шумо барои рушд ва шукуфоии футбол дар Тоҷикистон ва минтақа ташаккур мегӯям.

Бесаброна интизори вохӯрӣ бо шумоям. Бо эҳтиром Ҷанни Инфантино!”.

Бояд гуфт, ки “Истиқлол” рӯзи 15-уми декабр дар рақобат бо “Файзканд” бо ҳисоби бузурги 4:1 ғолиб омада, пеш аз муҳлат қаҳрамони Тоҷикистон дар мавсими 2023 гардид.

Ҳамин тавр, “Истиқлол” дар мавсими сипаришудаи Лигаи олӣ аз 22 бозӣ дар 16 вохӯрӣ дастболо гардида, 4 дидорро мусовӣ ва 2 рақобатро бо бохт анҷом дода, 52 имтиёз ба даст овард.

Яҳё МАҲМАДНАБИЕВ, “ҶТ”