“Аз ҳисоби ҳамин кори нонпазхонаам духтаронамро ба шавҳар додам, писаронамро оиладор кардам. Худоро шукр, ки имрӯз ҳамаамон соҳиби хонаву дари ободу зиндагии осуда ҳастем”,-мегӯяд холаи Фариштамоҳ Ашӯрова, нонпази номдори Тоҷикистон.

Зане, ки дар ҷомеа ӯро бо номи “нонпази президентӣ” мешиносанд. Аниқтараш, аксарият медонанд, ки ин бону бо пухтани нонҳои хушлаззаташ миёни мардум маъруфият пайдо кардааст. Ин зан Фариштамоҳ Ашӯроваи 68-сола мебошад, ки ба хотири пухтани нонҳои хушлаззати худ ҳанӯз соли 2010 бо даъвати Пешвои миллат ба шаҳри Душанбе омадааст ва имсол аз давраи оғози фаъолияту зиндагияш дар пойтахти Тоҷикистон 10 сол паси сар мешавад.

- Соли 2010 дар яке аз сафарҳои Пешвои миллат ба шаҳри Кӯлоб, мо, чанд нафар занон сари чакдон нон мепухтем. Пешвои миллат ба назди мо омаданду як пора нони чапотиро гирифта, ба даҳон андохтанд. Он кас зимни суҳбат иброз доштанд, ки лаззати нони тоҷикӣ беҳамтост. Сипас ба ман рӯ оварда, гуфтанд, ки “агар шуморо ба пойтахт даъват намоем, меравед? Барои сокинону меҳмонони пойтахт нони хушлаззати тоҷикӣ мепазед ва ин ҳунарро ба ҷавонон меомӯзед. Мо бояд ба ҷаҳониён собит созем, ки насли миллати озодаем ва ҳунармандию эҷодкорӣ рисолати таърихии мост”.

- Аз тарафи Ҳукумати кишвар ба зарардидагон манзилҳои истиқоматии нав сохта доданд. Президенти кишварамон муҳтарам Эмомалӣ Раҳмон ба хабаргирии зарардидагон ва супоридани хонаҳои навашон рафта буд. Дар хонаи нави бародарам, ки аз зарардидагони обхезии Кӯлоб буд, Роҳбари давлатро бо кулчаву чапотӣ, нону фатир ва дигар дастовезҳо истиқбол гирифтем. Баъд аз чаппотии пухтаи ман як пора шикаста хӯрданду гуфтанд барояшон оби хунук биёрем. Оби хунукро оварданд. Мисле ки ҳамон вақт таъми чапотии пухтаи ман ба Президенти кишвар маъқул шуд ва гуфт, ки ҷойи ин хел чапотиву кулчаву нон дар Душанбе аст, -бо табассум мегӯяд Фариштамоҳ Ашӯрова.

Дар ҳамон вохӯрии кӯтоҳ Пешвои миллат ба холаи Фариштамоҳ Ашӯрова пешниҳод кардааст, ки ба Душанбе биёяд ва зиндагиву фаъолияташро дар пойтахт ба роҳ монад. Ҳамзамон аз тарафи Сарвари давлат ваъдаи дастгирӣ кардан барои зиндагӣ ва ҷойи кор дарёфтааст.

- Ростӣ, вақте подшоҳ пешниҳод мекунад, чӣ хел метавонӣ аз ин хел пешниҳод рӯй гардонӣ?! Аз соли 2009 мо оилавӣ ба Душанбе омадем ва акнун қариб 11 сол мешавад, ки дар пойтахти кишварамон кору фаъолият ва зиндагӣ дорем,- афзуд холаи Фариштамоҳ.

13-уми июли соли 2018 бо ташаббуси Мақомоти иҷроияи ҳокимияти давлатии шаҳри Душанбе бо мақсади иҷрои дастуру супоришҳои роҳбарияти давлату Ҳукумати Тоҷикистон муҳтарам Эмомалӣ Раҳмон баҳри фароҳам овардани шароити хуби корӣ ва мусоидати ҳамаҷониба ба ҳунармандон, бахусус кадбонуҳои чирадаст бахшида ба “Соли рушди сайёҳӣ ва ҳунарҳои мардумӣ” дар маркази шаҳри Душанбе, дар буриши кӯчаҳои Мирзо Турсунзода ва Бухоро нонпазхонаи нави замонавӣ мавриди баҳрабардорӣ қарор гирифта буд, ки дар он “Нонпазхона” қаҳрамони мо Фариштамоҳ Ашӯрова бо духтарон у дигар пайвандонаш ба фаъолият пардохтанд.

Имрӯзҳо холаи Фариштамоҳ дар баробари пухтани анвои гуногуни нон, фатир, чапотӣ, кулча ва гирдачаҳо боз барои сокинони пойтахт қурутобу шакароб, фатиршӯрбо ва дигар анвои хӯрокҳои миллиро дар “Нонпазхона”-аш омода мекунад. Ба гуфтаи ӯ аз анвои нон, бештар фатир барои қурутобу шакароб ва фатиршӯрбо омода фармоиш қабул мекунанд. Ба ғайр аз рӯзҳои шанбе ва якшанбе, ки “Нонпазхона” фаъолият намекунад, дар дигар рӯзҳо ҷойи кори холаи Фариштамоҳро пур аз одам дидан мумкин аст. Ва аксари муштариён дар фасли сармо қурутоб ва фатиршӯрбо фармоиш медиҳанд.

Бинои мазкур ба таври замонавӣ, бо истифода аз нақшу нигори миллӣ сохта шуда, дар дохили он ҷойҳои махсус, аз ҷумла, барои пухтани нони таҳмол, фатир, гирдача, чапотӣ, дигар маҳсулоти нонӣ ва хӯрокҳои миллӣ омода гардидаанд.

Дар ин макон баробари фароҳам овардани шароити корӣ барои занони ҳунарманд, ҳамчунин ҷиҳати фароғату истироҳат ва истеъмоли хӯрокҳои миллӣ барои сокинону меҳмонони пойтахт шароити мусоид муҳайё гардидааст. “Ҳар гоҳе ки аз корафтодагон таҳсин мешунавам, ҳар вақте аз атрофиён иззату эҳтиром меёбам ва ҳар боре, ки сари дастурхони пурнозу неъмат бо фарзандон сарҷамъ менишинам, ба модари бузургворам изҳори миннатдорӣ менамоям. Маҳз талошу заҳматҳои ӯ буд, ки ҳунари кадбонугиро аз худ намуда, тамоми умр бо меҳнати ҳалол аз зиндагӣ баракат дидам. Солҳои зиёд дар шаҳри Кӯлоб ба ҳайси нонпаз фаъолият доштам. Аз рӯи ин пешаам дар маъракаҳои сокинони шаҳр фаъолона иштирок мекардам ва сарфарозам, ки нонҳои пухтаам писанди мардум мегардид. Ман аз ҳунармандӣ ҳамеша сарбаландӣ дидаам”, - изҳор намуд холаи Фариштамоҳ Ашӯрова.

Холаи Фариштамоҳ бештар аз 35 сол аст, ки нонпазӣ мекунад ва дар минтақаи Кӯлоб ва акнун пойтахти Тоҷикистон ӯро бисёриҳо мешиносанд.

Ин зани оқилаву рӯзгордида аз он изҳори нигаронӣ мекард, ки баъзе модарон ба ҳунари кадбонугии духтаронашон аҳамият намедиҳанд. Аз он таассуф мехӯрд, ки ин ҷавондухтарон баъди оиладоршавиашон аз сабаби надоштани ҳунари кадбонугӣ ба мушкилӣ дучор гардида, сабаби шунидани маломати хонаводаи шавҳар мегарданд. Ин бонуи чирадаст иброз дошт, ки яке аз сабабҳои ҷудошавии оилаҳои ҷавон низ маҳз беҳунарии ҷавондухтарон аст. Номбурда такрор ба такрор таъкид мекард, ки модарон ба ин масъала бетаваҷҷуҳ набошанду ба духтарони худ ҳатман ҳунари кадбонугӣ омӯзанд, то дар зиндагӣ муваффақу комёб гарданд.

Ин бонуи ҳунарманд борҳо бо “Сипоснома”-и Мақомоти иҷроияи ҳокимияти давлатии шаҳри Душанбе ва туҳфаҳои хотирмони дигар ниҳодҳои сатҳи ҷумҳурӣ сарфароз гардонида шудааст. Имрӯз бо чашидани нону чапотии Фариштамоҳ Ашӯрова, ки хеле болаззат мебошанд, бемуҳобот метавон гуфт, ки модари тоҷик зани воқеан ҳунарманд ва шоистаи ҳама гуна таҳсину офаринҳост!