Ҳамасола дар тамоми ҷаҳон аз 1 то 7 август Ҳафтаи дастгирии ғизодиҳӣ бо шири модар гузаронида мешавад. Дар Ҷумҳурии Тоҷикистон аз соли 2001 сар карда, ҳафтаи дастгирии ғизодиҳӣ бо шири модар ҳамчун даҳа аз 1 то 10 август гузаронида мешавад. 

Бо ин мақсад, яъне оғози даҳаи мазкур дар кишвар имрӯз 1 август, дар толори Вазорати тандурустӣ ва ҳифзи  иҷтимоии аҳолии Ҷумҳурии Тоҷикистон чорабинӣ доир гардид.

Саида Умарзода, муовини якуми вазири тандурустӣ ва ҳифзи иҷтимоии аҳолӣ зимни суханронӣ қайд намуд, тадқиқоти тиббӣ – демографии соли 2017 нишон дод, ки нишондоди  ғизодиҳӣ  танҳо бо шири модар (то синни 6 моҳагӣ) дар сатҳи ҷумҳури аз 34%-и дар соли 2012 то 36% дар соли 2017 афзудааст, ки ин хеле нишондиҳандаи кам аст.

Таъкид шуд, ки соли 2019 ин чорабинӣ таҳти унвони “Ҳуқуқҳо ва имкониятҳои волидайнро васеъ намуда, барои ғизодиҳӣ бо шири модар имконият фароҳам намоед” мегузарад. 

Дар идома қайд гардид, ки Вазорати тандурустӣ ва ҳифзи  иҷтимоии аҳолии Ҷумҳурии Тоҷикистон тасмим гирифтааст, стратегия ва нақшаи коммуникатсионии “1000 рӯзи тиллоии аввали ҳаёти кӯдак” – ро бо дастгирии Хазинаи кӯдакони Созмони Милали Муттаҳид ва шарикони рушд таҳия намояд. 1000 рӯзи тиллоии аввали ҳаёти кӯдак ин аз рӯзи ҳомиладорӣ то синни 2 солагии кӯдак ба ҳисоб меравад, ки он ғизои солим, нигоҳбини мувофиқ, инкишофи ҷисмонӣ, ақлонӣ – рӯҳии кӯдаконро дар бар мегирад.