Имрӯз дар майдончаи варзишии Муассисаи таҳсилоти миёнаи умумии №35-и пойтахт даври шаҳрии мусобиқа оид ба футболи хурд барои дарёфти “Ҷоми Ҳизби Халқии Демократии Тоҷикистон” бахшида ба 30-юмин солгарди Рӯзи таъсисёбии ҲХДТ баргузор гардид.

Дар маросими ифтитоҳии он Иброҳим Мирзозода, раиси Кумитаи иҷроияи Ҳизби Халқии Демократии Тоҷикистон дар шаҳри Душанбе, Раҷабалӣ Бобохонзода, сардори Раёсати кор бо ҷавонон ва варзиши шаҳри Душанбе, Нилуфар Каримзода, раиси Кумитаи иҷроияи ҲХДТ дар ноҳияи Шоҳмансур, Шоҳзод Раҳимзода, мудири шуъбаи ҷавонони Кумитаи иҷроияи ҲХДТ дар шаҳри Душанбе иштирок намуданд.

Нахуст, Иброҳим Мирзозода суханронӣ намуда, иброз дошт: “Боиси ифтихор ва сарфарозии мост, ки ташаббусҳои беназири Пешвои миллат, Раиси Ҳизби Халқии Демократии Тоҷикистон муҳтарам Эмомалӣ Раҳмон дар сатҳи ҷаҳон пазируфта шуданд ва онҳо мавриди татбиқ қарор доранд.

Ҳамзамон, боиси хушҳолии мост, ки пешниҳоди муҳтарам Рустами Эмомалӣ, Президенти ФФТ, раиси шаҳри Душанбе доир ба эълон кардани Рӯзи ҷаҳонии футбол дар ҷомеаи ҷаҳонӣ, ки яке аз бозиҳои дӯстдоштаи мардуми кулли ҷаҳон аст, қабул ва ҷонибдорӣ гардида, дар сатҳи ҷаҳонӣ таҷлил карда мешавад”.

Гуфта шуд, ки аз 18 май то 4 июн бо ҳузури 32 даста марҳилаи аввали ин мусобиқа дар пойтахти кишвар - шаҳри Душанбе доир гардида, 11 дастаи беҳтарини чаҳор ноҳияи пойтахт ба ин марҳила роҳхат гирифтанд.

Баъдан, бо садо додани Суруди миллӣ мусобиқаи мазкур расман ифтитоҳ гардид.

Ёдовар мешавем, мусобиқаи мазкур, ки бо ибтикори Ҳизби Халқии Демократии Тоҷикистон гузаронида шуда истодааст, даври шаҳрии он аз 7 июн то 19 июни соли равон идома меёбад.