Имрӯз дар меҳмонхонаи “Атлас”-и Душанбе курсҳои омӯзишӣ барои мураббиёни футзал ҷиҳати дарёфти муҷаввизи “Level-2”-и Конфедератсияи футболи Осиё оғоз ёфт.

Дар ин бора Федератсияи футболи кишвар хабар медиҳад.

Бино ба иттилои манбаъ, дастурдиҳандаи асосии курсҳо инструктори КФО, собиқ сармураббии тими миллии Эрон Ҳусейн Шамс буда, ба ӯ дастурдиҳандаи Федератсияи футболи Тоҷикистон Ҳусейн Шодиев кӯмак мекунад.

Тибқи иттилоъ, дар маросими кушодашавии курсҳои мураббигӣ ноиби президенти Федератсияи футболи Тоҷикистон Алишер Урунов ширкат намуда, ба иштирокчиён дар омӯзиши барномаи сертификати “Level-2” муваффақият таманно кард.

Ҳамин тариқ, 14 довталаб барои дарёфти иҷозатномаи “Level-2” ба омӯзиш фаро гирифта шудаанд. Барномаи курсҳои омӯзишӣ дарсҳои назариявӣ ва амалиро дар бар гирифта, донишҷӯёне, ки курси мазкурро бомуваффақият хатм мекунанд, соҳиби иҷозатномаи мураббии футзали “Level-2”-и КФО мешаванд.

Ҷасури ҚИЁМИДДИН, “ҶТ”