Аз 20 то 24 июни соли 2019 лагери ҷумҳуриявии омӯзишӣ таҳти унвони “Ҷавонон – пайрави Пешвои миллат” аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Созмони байналмилалии муҳоҷират таҳти сарпарастии Президенти Федератсияи футболи Тоҷикистон Рустами Эмомалӣ дар бошгоҳи лагери тобистонаи “Шоҳин” баргузор мегардад.

Субҳи 20 июн, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдуллозода Аҳтам Рустам бо иштирокчиёни лагери омӯзишии “Ҷавонон – пайрави Пешвои миллат”, ки аз тамоми манотиқи кишвар ҷамъ омадаанд, мулоқот намуданд. 

Раиси Кумита аз иштирокчиёни лагер хоҳиш намуд, дар рафти дарсҳову семинарҳои омӯзишие, ки дар лагер мегузарад, фаъол бошанд ва вақти худро босамар истифода намоянд. Зеро чунин лагер василаи бо ҳам дӯсту ошно шудани ҷавонони манотиқи кишвар мебошад.

Дар назар аст, ки дар лагери омӯзишӣ ба ҷавонон семинарҳои омӯзишӣ доир намуда, корҳои назариявӣ – амалӣ миёни иштирокдорон роҳандозӣ карда шавад. Иштирокдорон дар охир ба диплом ва сертификат сарфароз гардонида мешаванд.

Дар рӯзи нахустини лагер иштирокчиёнро дар даромадгоҳи истироҳатгоҳи “Шоҳин” бо нону намак ва мусиқӣ пешвоз гирифтанд. Сипас, иштирокчиён баъди ҷо ба ҷошавӣ ба гурӯҳҳо ҷудо шуда, ба кори лагер аз рӯи барнома шуруъ намуданд.