Рӯзи 10 апрели соли ҷорӣ дар шаҳри Душанбе семинари амалӣ дар мавзӯи “Инъикоси мавзӯи зӯроварии хонаводагӣ ва риояи баробарии ҳуқуқи аъзои оила дар ВАО – воқеият ва дурнамоҳо” бо иштироки намояндагони воситаҳои ахбори оммаи кишвар баргузор гардид. Дар он масоили мубрами ҷомеа, аз қабили поймолшавии ҳуқуқи занон, хушунати хонаводагӣ, зӯроварӣ нисбат ба занону кӯдакон, роҳҳои пешгирӣ аз ин падидаи номатлуби ҷомеа мавриди таҳлилу баррасӣ қарор дода шуданд.

Дар семинар, ки бо ташаббуси Лоиҳаи пешгирии зӯроварии хонаводагӣ дар Тоҷикистон доир карда шуд, кормандону мутахассиони Кумитаи кор бо занон ва оилаи назди Ҳукумати мамлакат, мушовир оид ба масъалаҳои иҷтимоии Лоиҳаи пешгирии зӯроварии хонаводагӣ иштирок ва суханронӣ намуданд.

Таъкид гардид, ки тибқи қонунгузории Ҷумҳурии Тоҷикистон зӯроварии оилавӣ ҷиноят эътироф гардидаву нисбати нафароне, ки бевосита ва ё бавосита ба чунин аъмол даст мезананд, ҷазои ҷиноятӣ пешбинӣ шудааст.

Масъалаи зӯроварӣ дар оила масъалаи муҳими ҷомеаи имрӯза ба ҳисоб рафта, мебояд ба ҷабрдидагони хушунати оилавӣ кӯмаки саривақтӣ расонида шавад. Дар инъикоси дуруст, таҳлил, дарёфт, пешгирӣ ва аз байн бурдани омилҳои асосиии ба зӯроварии оилавӣ мусоидаткунанда нақши рӯзноманигорон муҳим арзёбӣ карда шуд. Албатта барои коҳиш додани ин зуҳуроти барои ҷомеа номатлуб мақомоти дахлдори давлатӣ дар якҷоягӣ бо кормандони ҳифзи ҳуқуқ, равоншиносон, ходимони дин ва аҳли ҷомеа низ бояд саҳмгузор бошанд.

Иштирокчиёни семинар сабабҳои ҷой доштани хушунат дар оилаҳоро бекорӣ, паст будани маърифати ҳуқуқии ҷавонон маънидод намуданд. Зикр карда шуд, ки ҳангоми инъикоси ин мавзӯъ дар расонаҳои хабарӣ бояд ба тарзи дурусти таҳлили мавзӯъ, риояи одоб ва принсипҳои зарурӣ ҳангоми таҳияи маводҳо дар мавзӯъҳои баробарҳуқуқии зану мард дар ҷомеа, кашфи омилҳое, ки барои зӯроварӣ дар оила замина фароҳам меоранд ва роҳҳои пешгирӣ ва коҳиш додани ин зуҳуроти номатлуби ҷомеа таваҷҷуҳи хосса зоҳир карда шавад.