25-уми ноябр дар шаҳри Душанбе  як давраи омӯзишӣ доир ба шаклу тарҳи девораи намоишгоҳ ва ҷобаҷогузории маҳсулот баргузор гардид, ки дар он Габриэла Бёрде , мушовири Маркази тиҷоратии байналмилалӣ  ширкат варзида, аз намунаҳои маҳсулот барои каталоги намоишгоҳ аксҳо бардошт.

Г. Бёрде ки аз 22-юм то 26-уми ноябр дар Тоҷикистон қарор дошт,  доир ба тарроҳӣ ва рушди маҳсулоти ҳунармандӣ бо иштирокдорони ояндаи намоишгоҳи Франкфурт машғулиятҳои машваратии инфиродӣ доир кард. Дар ҷараёни сафараш бону Бёрде бо намунаҳои маҳсулоте, ки ширкатҳо барои намоишгоҳ омода кардаанд, шинос шуд ва барои беҳтар намудани онҳо тавсияҳо дод.

Бояд гуфт, ки ин дуввумин сафари Габриэла Бёрде ба Тоҷикистон дар соли ҷорӣ буд, ки бо ҳадафи ёрӣ ба иштирокдорони Ambiente аз Тоҷикистон ҷиҳати омодагӣ ба намоишгоҳ сурат гирифт. Хонум Бёрде дар моҳи июни соли ҷорӣ низ аз Тоҷикистон бо ҳадафи интихоби ширкатҳои ҳамкор ҷиҳати иштирок дар намоишгоҳи Франкфурт боздид карда буд. Корхонаҳои интихобшуда ҳамчунин, дар моҳи сентябри соли ҷорӣ дар шаҳри Бишкек рангпардозии мувофиқ ба меъёрҳои қабулшудаи Иттиҳоди Аврупоро омӯхтанд.

Лоиҳаи МТБ ба ёриҳои худ ба Иттиҳоди ҳунармандони Тоҷикистон ва ширкатҳои Рухом, SOHSA/Озара, Помир Ҷемз ва Армуғон/АРТЗ ҷиҳати омодагӣ ба иштирок дар намоишгоҳи байналмилалии махсулоти ҳунармандии AmBiente идома медиҳад.  

Намоишгоҳ  моҳи феврали соли 2017 дар шаҳри Франкфурти Олмон баргузор мешавад ва Тоҷикистон дар он барои саввумин бор иштирок мекунад.

Қобили қайд аст, ки Маркази тиҷорати байналмилалӣ бо мусоидати Ҳукумати Швейтсария ҳадаф дорад, то сатҳи рақобатпазирии соҳаи нассоҷиву дӯзандагии Тоҷикистонро боло барад. Барои иҷрои ин ҳадаф ба корхонаҳои хурду миёна ва ниҳодҳои марбути пуштибони тиҷорат ёрии вижаи соҳавӣ расонида мешавад.