Дар нимсолаи аввали соли 2019 дар ҷумҳурӣ чор ҳодисаи ҳамлаи гургон ба одамон ба қайд гирифта шудааст.

Дар ин бора Салимзода Муҳаммадҷон, муовини раиси Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон 25 июл, зимни нишасти хабарӣ иттилоъ дода, дар шарҳи ин ҳодисаҳо гуфт: “Чор ҳодисаи ҳамлаи гургон ба одамон дар қаламрави ВМКБ ба қайд гирифта шуда, бар асари он ду нафар сокинони маҳаллӣ ҳалок ва ду тани дигар захмӣ шуданд”.

Дар идома вобаста ба ҳодисаҳои нохуш дар об таъкид гардид, мутаассифона бо вуҷуди роҳандозии рейдҳои пайваста ва чорабиниҳои таблиғотӣ дар иншоотҳои обӣ одамон ба ҳалокат мерасанд. Аз ҷумла ба асари риоя накардани қоидаҳои бехатарӣ ҳангоми шиноварӣ дар 6 моҳи аввали соли ҷорӣ 57 нафар дар рӯдхонаву кӯлҳо ғарқ ва ҳалок гардидаанд, ки аз ин шумора 28 нафараш наврасони синни то 17-сола мебошанд.