Бар асари риоя накардани қоидаҳои техникаи бехатарӣ ҳангоми оббозӣ дар кӯлу рӯдҳо ва каналҳо 87 нафар ҷон бохтаанд.

Ин нуктаро 4 август, Рустам Назарзода, раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон зимни нишасти матбуотӣ баён намуд.

- Сарфи назар аз рейдҳои пайваста, дидору мулоқоти кормандону мутахассисони ҚҲФ бо сокинон, муроҷиат аз тариқи радио, телевизион ва сомонаи кумита, мутаассифона, дар иншоотҳои обии кишвар одамон ба ҳалокат мерасанд. Бар асари риоя накардани қоидаҳои техникаи бехатарӣ ҳангоми оббозӣ дар давраи ҳисоботӣ дар рӯду кӯлҳо ва каналҳо 87 нафар ҷон бохтанд, ки соли гузашта ин шумора 84 нафарро ташкил медод, - гуфт раиси кумита.

Гуфта шуд, ки аз шумораи ҳалокшудагон 72 нафар мардон ва 15 нафар занон мебошанд.

Инчунин ӯ гуфт, ки аз ин миқдор 10 нафар дар ВМКБ, 22 нафар вилояти Суғд, 32 нафар дар вилояти Хатлон, 16 нафар ноҳияҳои тобеи ҷумҳурӣ, 7 нафар дар шаҳри Душанбе мебошанд.

Аз шумораи умумии ғарқшудагон 46 нафар кӯдакон ва наврасони то 16-сола ва 41 нафар аз 17-сола боло будаанд.
Омилҳои асосии чунин ҳодисаҳоро ба беэҳтиётӣ, оббозӣ кардан дар ҷойҳои мамнуъ ва беназоратии волидон рабт дода шуд.