Суди Олии Ҷумҳурии Тоҷикистон дар шаш моҳи соли 2022 барои риоя накардани Қонуни Ҷумҳурии Тоҷикистон "Дар бораи танзими анъана ва ҷашну маросимҳо дар Ҷумҳурии Тоҷикистон" 407 нафарро ба маблағи умумии 1 миллиону 868 ҳазору 416 сомонӣ ҷарима кардааст.

Ин нуктаро раиси Суди Олӣ Шермуҳаммади Шоҳиён 14-уми июл зимни нишасти хабарӣ иттилоъ дод.

- Дар ин давра аз ҷониби судҳо барои риоя накардани Қонун "Дар бораи танзими анъана ва ҷашну маросим дар Ҷумҳурии Тоҷикистон" 416 парванда баррасӣ гардида ба 407 шахс ба маблаги 1868416 сомонӣ ҷазои ҷарима татбиқ гардид,- иброз дошт Ш. Шоҳиён.

Ҳамзамон, раиси Суди Олии кишвар қайд намуд, ки ин қонуншиканиҳо бештар аз ҷониби шаҳрвандони одӣ ба қайд гирифта шудааст ва шумораи қонуншикании мансабдорон хеле кам ба назар мерасад.

"Мутаассифона, раванди талаботи қонуни мазкур чӣ гунае, ки оморҳои расмӣ нишон медиҳад, зиёд шуда истодааст. Омори алоҳида оид ба он ки чанд нафар шахсони мансабдор қонунро риоя накардаанд, нест. Лекин аз маълумотҳое, ки ба мо пешниҳод мекунанд, шумораи мансабдороне, ки ба қонуншиканӣ даст зада бошанд, хеле каманд. Асосан шаҳрвандони одӣ аксаран аз надонистани талаботи қонун, як қисми дигар дидаву дониста ба хотири баргузор кардани тӯю маросимҳо қонуншиканӣ мекунанд”,-гуфт раиси Суди Олӣ.

Ҳамзамон дар нишаст гуфта шуд, ки шумораи баррасии парвандаҳо оид ба риоя накардани Қонун "Дар бораи масъулияти падару модар дар таълиму тарбияи фарзанд" ба 10 ҳазору 191 адад расида, дар ин парвандаҳо нисбати 3530 нафар ҷазои огоҳӣ ва 5693 нафар ҷарима ба маблағи 1044709 сомонӣ таъин карда шудааст.