ҶОМЕА
Сешанбе 07 Декабр 2021 12:50
8121
Тӯли 24 сол мешавад, ки миллати тоҷик 27 июнро ҳамчун рӯзи Ваҳдати миллӣ бо шукӯҳу шаҳомат таҷлил мекунанд. Барои расидан ба ин неъмати бебаҳо роҳи тӯлонии пурпечутоб паси сар гардидааст. Хушбахтона, мо имрӯз дар фазои сулҳу субот ба сар мебарем. Вобаста ба ин санаи фархунда андешаҳои ҷавонони касбу кори гуногунро пурсон гардидем.

Алиназар Ашуров.jpg

Алиназар АШӮРОВ,
корманди Маркази тадқиқоти стратегии назди Президенти Ҷумҳурии Тоҷикистон:

- Дар шароити имрӯзаи ҷаҳон ва зуҳури таҳдидҳои нав ба нав нақши Ваҳдати миллӣ дар нигоҳдории суботу оромии ҷомеа хеле муҳим аст. Дар асоси мушоҳида, таҳлил ва хулосаи равандҳои сиёсии ҷаҳон, бозиҳои сиёсӣ ва ҷангҳои иттилоотӣ дар фазои маҷозӣ гуфтан мумкин аст, ки барои давлатҳои миллӣ дар оянда масъалаи ҳифз ва нигоҳдории ваҳдати миллӣ аҳамияти бештарро касб менамояд. Масалан, таърихи сиёсии Тоҷикистон собит намудааст, ки то кадом андоза Ваҳдати миллӣ дар таъмини оромӣ ва пешрафти ҷомеа нақши муҳим дорад. Ваҳдати миллӣ дар рушди устувори Ҷумҳурии Тоҷикистон нақши басо бузург дорад. Имрӯз, ки дар кишвар Ваҳдати миллии фарогир аст, маҳз ҳамин суботу оромӣ ба мо имкон дод, ки дар як муддати кӯтоҳ ба бисёр дастовардҳо ноил гардем.

Файзуллозода Заррина.jpg

Заррина ФАЙЗУЛЛОЗОДА,
раиси Кумитаи иҷроияи ҲХДТ дар ноҳияи Синои шаҳри Душанбе:

- Кулли ободию пешравиҳо дар сурати оромӣ ва суботи ҷомеа ба даст меояд. Кишвари азизу муқаддаси мо, Тоҷикистон баъди ба даст овардани Ваҳдати миллӣ тавонист, ки барои пешрафти худ замина гузорад. Ҳамаи пешрафтҳои ҳаёти имрӯзаи мо дар ҳама самту соҳаҳо натиҷаи ин неъмати бебаҳост. Вазифаи ҷонии мост, ки ин неъмати бебаҳоро ҳифз намоем ва барои таҳкиму тақвияти он талош варзем.

Мумин Худоиев.jpg

Мумин ХУДОИЕВ,
раиси ҷамоати деҳоти Назаршо Додхудоеви ноҳияи Рӯшон:

- Имсол мо 24 – умин солгарди Ваҳдати миллиро ҷашн мегирем. Боиси ифтихор аст, ки мо дар кишвари дорои сулҳу субот, орому осуда умр ба сар мебарем. Ҷавонони даврони саҳибистиқлол бояд аз ҳамаи ин оромиҳои кишвар хуб истифода бурда, бо ҳамдигар дӯст ва меҳрубон бошанд. Нагузорем, то душманони Ватан ва миллат боз донаи низоъро ба сарзамини сулҳпарвари мо партоянд. Баҳри ободии Ватан ҳам ҷавону ҳам калонсол бикӯшем ва муҳофизи беҳтарин неъматҳо – истиқлолияту ваҳдат бошем. Нақши Ваҳдати миллӣ дар сохтани нақбҳо, неругоҳҳои хурду бузург, роҳҳои кишвари офтобиамон хеле муҳим аст. Ҳар рӯз мо шоҳиди ободию пешрафт дар тамоми соҳаҳо мегардем, ки ҳамаи ин аз меваи Ваҳдати миллист.

Миҷгона Рустамзода.jpg

Миҷгона РУСТАМЗОДА,
табиб, номзади илмҳои тиб:

- Ваҳдати миллӣ барои мо дастоварди ниҳоят пурарзиш, шарти асосии некӯаҳволии халқ ва таҳкурсии боэътимоди пешрафту ободии Ватани маҳбубамон мебошад. Аз ин лиҳоз, вазифаи ҳар шахси худшиносу худогоҳ, ватандӯсту ватанпарвар аст, ки онро чун гавҳари бебаҳо ва дастоварди ниҳоят азиз ҳифз намояд. Ҳамин ваҳдат аст, ки мо – ҷавонон дар кулли соҳаҳо озодона фаъолият дорем. Пас, вазифаи ҳар яки мо, хусусан табибон содиқона ба халқу ватани худ хизмат намудан аст.


Одина Маҳмад.jpg

Одина МАҲМАД,
рӯзноманигор:

- Ваҳдати миллиро замоне халқ насиб мегардад, ки тамоми мардум ҳамчун ангушт дар як мушт ҷамъ омада, кишвари худро ба сӯи рушду шукуфоӣ мебаранд. Миллати бофарҳанги тоҷик дар замони бесарусомонии солҳои 90 -ум дарк карда буд, ки танҳо расидан ба Ваҳдати миллӣ метавонад, миллатро аз вартаи нобудӣ раҳонад ва Тоҷикистонро ба ҷаҳониён ҳамчун кишвари тамаддунофар муаррифӣ намояд. Бо дарки ҳамин маънӣ, дар як муддати кӯтоҳ халқ сарҷамъ шуд, дасти ҳам гирифт, то ба ваҳдати воқеӣ бирасад. Маҳз ҳамин талошу боварии халқ буд, ки имрӯз дар лабони тифлакон табассум, дар дили ҷавонон умеди ояндаи дурахшон ва дар забони падару модарон калимаи шукрона аст.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Декабр 2021 c.