Соли 2023 бо мақсади пешгирӣ намудани ҳолати қонунвайронкунӣ 992 санҷишҳои нақшавӣ ва 17087 амалиётҳои назоратӣ гузаронида шудааст, ки дар натиҷа 21224 ҳолати вайрон намудани талаботи қонунгузории соҳаи ҳифзи муҳити зист ошкор гардидааст.

Баҳодур Шерализода, раиси Кумитаи ҳифзи муҳити зисти назди Ҳукумати Ҷумҳурии Тоҷикистон имрӯз, 1-уми феврал, зимни нишасти хабарӣ дар ин бора ба рӯзноманигорон иттилоъ дод.

Ӯ зикр кард, ки дар ин давра дар самти назорати ихроҷи моддаҳои заҳрнок ба ҳавои атмосфера аз 140 иншоот дар 443 манбаъ ченкуниҳои инструменталӣ гузаронида шуда, ҳамзамон, дар самти назорати таҳлилии таъсири партовҳо ба манбаъҳои обӣ аз 339 иншоот 506 намунаи партовобҳо гирифта, ташхис карда шудаанд.

Гуфта шуд, ки бо мақсади устувор намудани мавқеи ҷумҳурӣ дар ҳалли масоили марбут ба партовҳо дар сатҳи минтақавию байналмилалӣ дар шаҳри Душанбе "Маркази минтақавӣ оид ба идоракунии партовҳо" таъсис дода шудааст.

Ба гуфти раиси Кумитаи ҳифзи муҳити зист қарор дар бораи таъсиси ин марказ 5-уми сентябри соли 2023, зимни ҷаласаи навбатии Комиссияи байнидавлатӣ оид ба рушди устувор ба тасвиб расида буд.

- Фаъолияти Марказ ба ҳамоҳангсозии давлатҳои минтақа ҷиҳати коҳиш додани таъсири манфии партовҳо ба муҳити зист, гузариш ба иқтисоди сабз ва тақвияти ҳамкориҳо ҷиҳати ҷалби маблағгузорӣ аз тарафи донорҳо ва шарикони рушд равона карда шудааст, - зикр кард раиси Кумита.

Амони МУҲАММАД, "ҶТ"