Дирӯз, 15 декабр, бо иштироки кормандон, ҳаҷвнигорон ва намояндагони васоити ахбори омма 90-солагии маҷаллаи ҳаҷвии “Хорпуштак” ҷашн гирифта шуд.

Зимни ифтитоҳи чорабинӣ Ашрафи Афзал, сармуҳаррири маҷалла, роҷеъ ба таърихи маҷаллаи мазкур андешаронӣ намуда, иброз дошт, ки маҷаллаи “Хорпуштак” гузаштаи пурғановате дорад. Зеро ҳам ҳайати эҷодии онро ҳаҷвнигорони шинохта ташкил медоданд, ҳам ҳайати таҳририяашро. Дар идома оид ба рисолати маҷалла гуфт, “Хорпуштак” бояд мактаби мубориза бо ҳама гуна қувваҳои бади аҳриманӣ дар ҷомеа бошад. Ҳар доғи зишти ҷомеаро дар худ акс кунаду доғгузоронро зери тозиёнаи беамони танқид гирад.

Дар чорабинӣ муаллифони собиқадори маҷалла масоили мубрами рӯзро ба шакли ҳаҷвӣ дар саҳифаҳои маҷаллаи мазкур инъикос мекарданд, иштироку суханронӣ карда, аз таърихи қариб якасраи маҷалла ёдоварӣ намуданд.



Дар рафти чорабинӣ озмуни маҷаллаи “Хорпуштак” бахшида ба 25-солагии Истиқлолияти давлатӣ ва 90-солагии маҷалла ҷамъбаст гардида, ғолибон бо туҳфаҳои хотиравӣ қадрдонӣ шуданд. Озмуни мазкур дар чор бахш гузаронида шуд, ки ҳайати ҳакамон ғолибонро чунин муайян карданд:

Дар бахши карикатура (расми ҳаҷвӣ):
1. Саодат Боронова
2. Насиба Назарзода
3. Гулрафтор Холматова

Дар бахши шеъри ҳаҷвӣ:
1. Мирзо Рустамзода
2. Зуҳро Оқилова
3. Шодибек Собирӣ

Дар бахши фелетон:
2. Рустами Сафар
3. Басгул Сафарзода
3. Фарҳод Иброҳимов

Дар бахши ҳаҷвия:
1. Эгамназари Соҳибназар
2. Нуруллои Ҳасан
3. Абдураҳими Муталзод

Ёдовар бояд шуд, ки маҷаллаи “Хорпуштак” аз соли 1926 ба нашр мерасад. Дар давраи Иттиҳоди Шӯравӣ маҷалла хеле бонуфӯз буд ва бо тиражи беш аз 100 ҳазор нусха, дар ҳаҷми 12 саҳифаи ранга, бо мусаввараҳои ҷолиби пурмазмун моҳе ду маротиба ба табъ мерасид. Маҷалла дар солҳои гуногун бо номҳои "Мулло Мушфиқӣ", "Калтак", "Бигиз", "Мушфиқӣ", "Хоҷа Насриддин" чоп шуда, аз соли 1953 номи "Хорпуштак"-ро гирифтааст.