Бо мақсади таъмини иҷрои саривақтию сифатноки даромад ва хароҷоти буҷети давлатӣ ва истифодаи самараноку мақсадноки воситаҳои давлатӣ, Палатаи ҳисоб дар вазорату идораҳо, марказ ва гурӯҳҳои татбиқи лоиҳаҳои сармоягузорӣ, бонкҳо, субъектҳои хоҷагидорӣ ва дигар муассисаҳои буҷетӣ дар нимсолаи якуми соли равон 89 санҷиш гузарондааст.

Дар ин бора имрӯз зимни нишасти хабарӣ Қарахон Чиллазода, раиси Палатаи ҳисоби Ҷумҳурии Тоҷикистон иттилоъ дода, дар идома гуфт, дар натиҷаи санҷишҳои мазкур қоидавайронкуниҳои молиявиро ба маблағи 158,8 млн. сомонӣ муайян намудаанд.        

Ба таъкиди ӯ аз маблағи умумии қоидавайронкуниҳои молиявии ошкоргардида, хароҷоти ғайриқонунии пулию молӣ 13,9 млн. сомонӣ камомад ва тасарруфи воситаҳои пулию молӣ 1,2 млн. сомонӣ, изофанависӣ дар корҳои таъмиру сохтмон 9,1 млн. сомонӣ, зарар, фурӯш ва иҷораи амволи давлатӣ 456,6 ҳазор сомонӣ, талафи воситаҳои пулию молӣ 65,3 млн. сомонӣ, маблағҳои кам ҳисобгардида ва рӯйпӯшнамудаи андозҳо 52,1 млн. сомонӣ, пардохти ҳатмӣ ва дигар пардохтҳо ба буҷети давлат 15 млн. сомонӣ ва пардохт накардани суди саҳмияҳои ба давлат тааллуқдошта, 1,6 млн. сомониро ташкил медиҳад.