ҶОМЕА
Ҷумъа 04 Декабр 2020 06:32
7569
Зери ин унвон имрӯз, 20 ноябр, дар толори фарҳангии Донишгоҳи давлатии Хоруғ бо иштироки муовини раиси Вилояти Мухтори Кӯҳистони Бадахшон Назира Амирбекзода, ректори донишгоҳ, профессор Шермамад Ҷонмамадов, масъулини дастгоҳи раиси вилоят ва омӯзгорону донишҷӯён конференсияи илмӣ – назариявӣ баргузор гардид.

Баъди садо додани Суруди миллии Ҷумҳурии Тоҷикистон чорабиниро муовини ректор оид ба илм ва инноватсияи донишгоҳ Таҳмина Содатқадамова ифтитоҳ намуда, иброз дошт, ки ҷашн гирифтани Рӯзи Парчами давлатӣ ба хотири бузургдошти қаҳрамонони миллат ва онҳоест, ки барои ҳимояи нангу номус ва марзу буми ин кишвар ҷоннисорӣ намуда, забон, фарҳанг ва ҳуқуқи давлатдории ин миллати куҳанбунёдро ҳифз намуда, то ба замони мо расонидаанд. Яъне ин эҳтиром ба рӯҳу равони Куруши Кабир, Коваи оҳангар, Шераку Деваштич, Исмоили Сомонӣ, Темурмалик, Рӯдакиву Фирдавсӣ Муқаннаъ ва Восеъ, Шириншоҳ Шоҳтемур, Нусратуллои Махсум ва садҳову ҳазорон абармардони гузаштаи тоҷик мебошад.

- Парчами давлатӣ барои мо, тоҷикон нишонаи бақои миллат, давлату Ватан, Ваҳдати миллӣ ва беҳтарин василаи тарбияи насли наврасу ҷавон дар рўҳияи хештаншиносӣ, ифтихор аз арзишҳои таърихию фарҳангии гузаштаи халқамон мебошад. Бинобар ин, ҳар як фарди равшанфикри кишварро зарур аст, ки нисбати рамзҳои давлатӣ, алалхусус Парчами давлатӣ арҷ гузошта, ба беэҳтиромӣ нисбати муқаддасоти олиамон роҳ надиҳад, - иброз намуд, Т. Содатқадамова.

Зикр гардид, ки барои хурду бузурги мамлакат Парчами давлатӣ ҳамчун муқаддасот, тимсоли Ваҳдати миллӣ ва ягонагӣ буда, мардумро ба сӯи созандагиву бунёдкорӣ ҳидоят мекунад. Дар зери Ливои миллӣ ҳар як тоҷику тоҷикистонӣ дар иттиҳоду ягонагӣ аз мавҷудияти давлати соҳибихтиёр чун ҷузъи ҷудонашавандаи ҷомеаи ҷаҳонӣ ва Ватану ватандорӣ ифтихор менамояд.

Дар идомаи конфронс Н. Амирбекзода қайд намуд, ки воқеан, миллати куҳанбунёди мо дорои таърих, суннатҳои қадимаи давлатсозӣ буда, парчамдорӣ барои миллат чун рамзи пирӯзии некӣ бар бадӣ аз замони Коваи оҳангар бо номи Дирафши Ковиёнӣ мерос мондааст.

- Парчами давлатии Ҷумҳурии Тоҷикистон таҷассумгари умеду ормонҳои миллӣ дар солҳои аввали Истиқлолияти давлатӣ, рӯзҳои сарнавиштсозу ҳассос дар Иҷлосияи таърихии Шӯрои Олии Ҷумҳурии Тоҷикистон бо як самимияти хосса пазируфта шуд. Пешвои миллат муҳтарам Эмомалӣ Раҳмон беҳуда нагуфтаанд: "Парчами миллӣ мояи ифтихори ҳар як шаҳрванди Тоҷикистони соҳибистиқлол, ифодагари иттиҳоду сарҷамъӣ, нангу номус, ватандўстиву ватанпарастӣ ва ҳуввияти миллии мардуми фарҳангии мо буда, мақсаду мароми созандаи тоҷиконро дар ҷилои рангҳои худ инъикос намудааст" - иброз дошт, муовини раиси вилоят.

Чорабинии илмӣ бо ташаббуси кафедраи фалсафа ва сиёсатшиносии донишгоҳ сурат гирифта, дар идомаи он маърӯзаҳои “Парчам – таҳкимбахши руҳу равони миллат”, “Таҷассумгари Истиқлолияти давлатӣ”, “Ливои муқаддаси тоҷикон”, “Халқу давлатро бо парчам мешиносанд” ироа гардиданд.


Эзоҳи худро нависед



Рамзҳо дар расм