Имрӯз - 26 декабр бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар Донишгоҳи давлатии тиббии Тоҷикистон ба номи Абуалӣ ибни Сино таҳти унвони “Паёми Президенти Ҷумҳурии Тоҷикистон - роҳнамои мо ба сӯи фардои дурахшон” ҳамоиши ҷавонону варзишгарон доир гардид.

Дар ҳамоиш Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Сурайё Дӯстмуродзода, муовини раиси кумита оид ба корҳои байналмилалӣ, иттиҳодияҳои ҷамъиятӣ ва иттилооти Маҷлиси намояндагони Маҷлиси Олӣ, Махфират Хидирзода, узви Комиссияи марказии интихобот ва раъйпурсии Ҷумҳурии Тоҷикистон, Нилуфар Имомзода, муовини раиси Кумита оид ба қонунгузорӣ ва ҳуқуқи инсони Маҷлиси намояндагони Маҷлиси Олӣ, Абдуллоҳи Раҳнамо, сармуҳаррири маҷаллаи “Адабиёт ва санъат”-и Иттифоқи нависандагони Тоҷикистон ва Муҳиддин Нуриддин, ректори Донишгоҳи давлатии тиббӣ суханронӣ намудаанд.

Ҳамчунин, дар ҳамоиши мазкур ҷавонони фаъол аз сохтору мақомоти давлатӣ, донишҷӯён, волонтёрон ва гиринадгони Стипендияи президентӣ иштирок карданд.

Ҳамоиш бо сухани ифтитоҳии Зулфиқор Гулаҳмадзода, раиси Кумитаи кор бо ҷавонон ва варзиш оғоз ёфта, дар идома маърӯзачиён бардоштҳои худро аз Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии кишвар ироа карданд.

- Паёми солонаи Пешвои миллат ба Маҷлиси Олӣ фарогирии таҳлили самтҳои асосии сиёсати дохилӣ ва хориҷии кишвар буда, муайянсозандаи дурнамои рушди Тоҷикистони соҳибистиқлол аст. Он яке аз муҳимтарин санадҳои сиёсию барномавӣ ба ҳисоб рафта, таҷассумгари пайдарҳамии таърихӣ, тафаккури стратегӣ ва масъулияти сиёсӣ нисбат ба ояндаи давлат мебошад. Лозим ба ёдоварист, ки дар даврони соҳибистиқлолии кишвар паёмҳо тадриҷан аз ҳадафҳои ҳифзи давлат ва барқарорсозии субот ба марҳилаи рушди устувор, ташаккули иқтисоди миллӣ ва муаррифии фаъоли Тоҷикистон дар арсаи байналмилалӣ гузашт,-изҳор дошт, Зулфиқор Гулаҳмадзода.

Маърӯзачиёни дигар ҳам Паёми солонаи Президенти кишвар ба Маҷлиси Олиро аз муҳимтарин ҳуҷҷатҳои барномавӣ ва фарогири масъалаҳои мубрами миллӣ ва байналмилалӣ унвон карда, онро бозгӯйи амиқи матонат, дурандешӣ ва хиради волои Сарвари давлат арзёбӣ намуданд.

Дар интиҳо, барои ғамхориҳои падарона ва фароҳам кардани шароитҳои созгор ба ҷавонону варзишгарон гирандаи Стипендияи президентӣ аз шаҳри Душанбе Малика Бахталиева аз номи ҷавонон ва варзишгар Руҳафзо Ҳақназарова аз номи кулли варзишгарони кишвар ба Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон миннатдорӣ баён карда, бо садо додани Суруди миллӣ ба Ҳамоиш ҳусни анҷом бахшиданд.