Боиси ифтихор аст, ки имрӯз ҷавонони мо дар ҷодаҳои хеш муваффақанду давлатамонро тавассути пешаи худ дар дохил ва хориҷи кишвар муаррифӣ менамоянд. Ин гуна ҷавонон барои насли наврас ва ояндагони миллат намуна буда, онҳоро бояд муаррифӣ намуд.

Эсан Шафиев аз зумраи чунин ҷавононест, ки аз хурдсолӣ меҳри табибиро дар қалби худ мепарварид. Ӯ мактаби миёнаро бо баҳои хубу аъло хатм намуда, барои ба мақсади худ расидан, ба фанҳои химияву биология аҳамияти ҷиддӣ медод. Ӯ барои табиби хуб шудан, ба Донишгоҳи давлатии тиббии Тоҷикистон бо номи Абӯали Ибни Сино дохил шуд.

Худи Эсан мегӯяд, соли аввали таҳсил зиёд машаққат кашид. Бо вуҷуди ин ҳама ӯ талош намуд, то ба қавли хеш - “табиби хуб шудану ба халқи худ хизмат кардан” амал намояду ихтисосашро хуб аз бар созад.

“Ҳамеша талош мекардам, то тамоми нозукиҳои пешаамро аз бар намоям. Қатори дигар донишҷӯён ман низ дар хобгоҳи донишгоҳ ҷо гирифтам ва он ҷо дӯстони зиёде пайдо кардам. Доим кӯшиш менамудам, то ҳар дақиқаи хешро самаранок истифода намоям”, - иброз дошт, Эсан Шафиев.

Ӯ вақтҳои холии худро зиёдтар дар китобхона ё назди устодон сипарӣ мекард, то ин ки тавонад, донишашро такмил диҳад. Бо мурури замон ӯ аллакай дар гузаронидани ҷарроҳии қалб иштирок мекард.

Пас аз гузашти 6 сол, яъне соли 2011 Эсан донишгоҳро бомуваффақият хатм намуда, бо даъвати устодонаш дар Русия дар беморхонаи Маркази миллии тадқиқоти тиббии ҷарроҳии дилу рагҳои ба номи А.Н.Бакулева ба ҳайси духтури дил дар шуъбаи ҷарроҳӣ ба фаъолият оғоз намуд.

Худи ҳамон сол низ дар кишвари Русия ба ординатура дохил шуда, аз соли 2013 то соли 2015 аспирантураро низ бо баҳои аъло хатм намуд. Дар баробари таҳсил ӯ ҳамзамон дар беморхона низ кору фаъолият мекард. Баъди бомуваффақият гузаронидани аввалин ҷарроҳии қалб, номбурда ҳамчун табиби хуб дар шаҳрҳои Русия эътироф гардид ва ба худ обрӯву эътибори хоссаро касб намуд.

Дар бештари минтақаҳои Русия ӯро ҳамчун табиби хуб барои ҷарроҳии бемориҳои қалб ба беморхонаҳо даъват мекарданд. Дар баробари ҷарроҳии қалб, ӯ бемориҳои гуногуни дилро табобат менамуд. Вай яке аз беҳтарин мутахассисони рентгенологӣ оид ба табобати бемориҳои қалбӣ шинохта мешавад.

“Дар муддати фаъолиятам зиёда аз 1000 нафар беморро ҷарроҳӣ намудаам, ки ҳамааш натиҷаи хуб доданд. Аз Тоҷикистон низ бисёр беморонро табобат кардаам. Ягона кӯмаки ман барои ҳамдиёронам дар мулки бегона ин хуш қабул кардан ва ёрӣ расонидан ба онҳост”, – афзуд ӯ.

Ҳангоми паҳншавии бемории сироятии COVID-19 ӯ на фақат бо ихтисоси худ дар беморхона кор мекард, балки барои шаҳрвандони кишвар, ки дар Русия қарор доштанд, ёрии худро дареғ надошт. Вай шабонарӯзӣ кор карда, дар рӯзҳои душвортарин дар хизмати мардум буд.

Лаҳзаҳои фаромӯшнашавандаи Эсан ин ҷарроҳии қалби зани 101 сола буд, ки онро бо муваффақият гузаронд. Ин зан миннатдории худро ба ӯ баён намуда, хостааст, дар бораи фаъолияти Эсан дар тамоми васоити ахбори оммаи Русия гӯяд.

Дар воқеъ, муваффақ шудани як шаҳрванди тоҷик чӣ дар дохил ва чӣ дар хориҷи кишвар, ин натанҳо муваффақияти як нафар, балки муваффақияти тамоми мо маҳсуб меёбад. Чун бо ин гуна дастовардҳо мо метавонем, Тоҷикистони азизамонро ба оламиён муаррифӣ намоем.

Эсан имрӯз аз он шод аст, ки орзуи худ ва падару модарашро бароварда кард ва дар соҳаи хеш муваффақ шуд. Ӯ ҳамеша пайи омӯзиши навовариҳои соҳаи хеш асту мо дар ин ҷода барояш комёбӣ хоҳонем.