Бо ибтикори Раёсати кор бо ҷавонон ва варзиши вилояти Суғд, 10 апрел, дар Донишгоҳи давлатии Хуҷанд ба номи академик Б.Ғафуров конфронси вилоятӣ таҳти унвони “Пешвои миллат-наҷотбахши сайёра” бахшида ба Даҳсолаи байналмилалии амал “Об барои рушди устувор, 2018-2028” баргузор гардид.

Конфронс бо мақсади тарғиб намудани сиёсат ва ташаббусҳои Ҳукумати Ҷумҳурии Тоҷикистон дар соҳаи об, оқилона ҳифз намудани захираҳои обӣ дар шароити гармшавии иқлим, ҷалби таваҷҷуҳи ҷомеа ба ҳифзи захираҳои оби ошомиданӣ ва баҳри самараноку сарфаҷӯёна истифода бурдани ҳар қатра об гузаронида шуда, дар он беш аз 250 нафар донишҷӯёни муассисаҳои таҳсилоти олӣ ширкат варзиданд.

Зикр гардид, ки Тоҷикистон ҳамчун кишвари соҳибистиқлол мақом ва ҷойҳои хоси худро дар сатҳи байналмилалӣ доро буда, ҳамчун узви комилҳуқуқи СММ ва дигар созмонҳои бонуфуз дар баробари кишварҳои аз лиҳози иқтисодию технологӣ пешрафта баробар овоз дорад.

Бо истифода аз ин ҷойгоҳ Пешвои миллат ҳамчун сиёсатмадори дурбин бо пешниҳоди масъалаи об ташаббускори асосӣ маҳсуб меёбад.