ҶОМЕА
Ҷумъа 04 Декабр 2020 06:26
7374
Таҳти ҳамин унвон дар толори фарҳангии мақомоти иҷроияи маҳаллии ҳокимияти давлатии Вилояти Мухтори Кӯҳистони Бадахшон бо иштироки раиси Кумитаи иҷроияи Ҳизби халқии демократии Тоҷикистон (КИМ ҲХДТ) дар ВМКБ Рустам Фелалиев, 100 нафар донишҷӯёни фаъоли Донишгоҳи давлатии Хоруғ ба номи Моёншо Назаршоев (ДДХ), Коллеҷи тиббии маркази вилоят ва собиқадорони меҳнат ҳамоиш баргузор гардид.

Зимни ифтитоҳи чорабинӣ Рустам Фелалиев, раиси Кумитаи иҷроияи Ҳизби халқии демократии Тоҷикистон (КИМ ҲХДТ) дар ВМКБ ибрози намуд, ки дар муддати на чандон дарози таърихи соҳибистиқлолӣ Тоҷикистон таҳти сарварии Асосгузори сулҳу ваҳдати миллӣ - Пешвои миллат, раиси КИМ ҲХДТ, Ҷаноби Олӣ муҳтарам Эмомалӣ Раҳмон ба як давлати комил табдил ёфт ва миллати тоҷик ба ояндаи неки давлатдорӣ умед пайдо кард.

“Ҳоло тамоми тоҷикони дунё Тоҷикистонро хонаи умеди худ ва Сарвари давлатро чун Пешвои тоҷикони дунё эътироф мекунанд. Ҳадафҳои стратегии муайянкардаи Ҷаноби Олӣ зина ба зина ҳалли худро ёфта, ҳоло ВМКБ дар баробари дигар манотиқи кишвар ба таври шинохтанашаванда симои худро дигар намуда, некуаҳволии ин диёри дурдаст давра ба давра беҳтар шуда истодааст. Ҳатто дар замони собиқ Иттиҳоди Шӯравӣ вақте ки мо донишҷӯ будем, дар як сол як маротиба ба шаҳри Хоруғ барои дидорбинии падару модар омада метавонистему халос. Дар замони соҳибистиқлолӣ бошад, бо кушода шудани шоҳроҳи Душанбе – Кулоб – Хоруғ – Кулма, мавриди баҳрабардорӣ қарор гирифтани пулҳои аҳамияти байналмилалии Тоҷикистону ҳамсоякишвари Ҷумҳурии исломии Афғонистон, ВМКБ на танҳо аз бумбасти коммуникатсионӣ ба пуррагӣ баромад, балки ба минтақаи транзитии мамлакат табдил ёфт. Бо дастуру супоришҳои Пешвои муаззами миллат НБО - и “Помир – 1”, НБО-и “Тоҷикистон” дар ноҳияи Мурғоб, инчунин неругоҳҳои хурду миёна дар ноҳияҳои Ванҷ, Дарвоз, Ишкошим ба истифода дода шуда, сохтмони НБО-и Себзори ноҳияи Роштқалъа бо маром идома дорад. Ҳамаи ин дастовардҳо имконият медиҳанд, ки вилоят аз барқи хусусияти истеҳсолӣ дошта таъмин гардаду бо ба истифода додани агрегатҳои 3, 4, 5, 6 - уми НБО-и “Роғун” Тоҷикистон аз давлати аграрӣ – саноатӣ ба давлати индустриалӣ – саноатӣ ва содиркунандаи неруи барқи аз ҷиҳати экологӣ тоза табдил ёбад”- гуфт дар идома Р. Фелалиев.

Бесабаб набуд, ки Сарвари давлат дар Паёми навбатӣ ба Маҷлиси Олӣ суханро аз вазъи сиёсати имрӯзаи ҷаҳон оғоз бахшид ва дар маҷлиси васеи кумита низ оид ба пешгирӣ ва роҳ надодани гаравиши ҷавонон ба ҳизбу ҳаракатҳои тундрав супоришу ҳидоятҳо доданд.

Рустам Фелалиев дар идома вобаста ба ин масъала таъкид намуд, ки “Феълан яке аз мудҳиштарин мубориза ин ҷанги иттилоотӣ ба ҳисоб меравад ва он ҳатто аз мушакҳои пурқуввати ҳавоӣ ҳам хавфноктар аст. Баъзе одамон, ки ба номи шири поки сафеди модари тоҷик қасам ёд карда, бо нону намаки Тоҷикистон ба камол расидаанд, қариб ҳамарӯза бо ҳадаф, туҳмат ва ғаризаҳои нопокашон шабакаҳои иҷтимоиро олуда месозанд. Аз рӯи этикаи ҷаҳонӣ ин нафарон ҳатто ҳуқуқи маънавӣ ҳам надоранд, ки аз номи мардуми Тоҷикистон, минҷумла сокинони ВМКБ баромад карда, ақидаҳои ифрогароӣ ва ҷудоихоҳиро паҳн кунанд. Дар арсаи олам танҳо Сарвари давлат ҳақ дорад, ки аз номи мардум дар минбарҳои баланд баромад намоянд”.

Фархунда Муродова, донишҷӯи курси якуми факултети биологияи ДДХ изҳор дошт, ки воқеан бо гузашти давраҳои гуногуни таърихӣ шинохти марҳилаи давлатдориву давлатсозӣ собит намуд, ки низом ё неруи сиёсӣ – иҷтимоии кишвар дар фурсати хеле кӯтоҳ бозтоб ёфт ва қобили эътибор дониста шуд. Ӯ гуфт: “Бо марҳилаҳои тайкарда Ҳизби халқии демократии Тоҷикистон аввалин шуда, мавқеи сиёсӣ ва созандаи худро барои ояндаи дурахшони Тоҷикистон дар пешбарии номзади арзанда, ғамхори миллат, кафили иттиҳоди мардум ва таҳкими соҳибистиқлолии кишвар муайян намуд. Пешвои миллат муҳтарам Эмомалӣ Раҳмон ягона роҳбари арзандае ҳаст, ки миллату давлати тоҷикро аз вартаи нестӣ ба олами ҳастию зиндагии шоиста оварда, нақши ӯ дар давлатсозии навин бесобиқа мебошад”.

Дар ҳамоиш инчунин Дурдонамо Дастамбуева, мудири Шуъбаи кор бо занон ва ҷавонони Кумитаи иҷроияи ҲХДТ дар ВМКБ, беҳтарин хонандагони МТМУ – и шаҳру навоҳии вилоят ва дигар аъзоёни ҳизби болозикр маърӯза карда, ҷавонони фаъоли вилоят бо ифтихорномаҳои гуногун сарафроз шуданд.

Эзоҳи худро нависед



Рамзҳо дар расм